Shillong, May 3: May 4 tarikoni a•bachenge wal 8:00 bajioni pring 5:00 bajiona Shillong-o curfew-ko ong•atenga ine Meghalaya sorkari parakataha.

Shillong songjinmao pilak dokkanrangkon attam 7:00 baji dipet chipna gitaba sorkari tik ka•angaha.

Iani bidingo kobor ra•timgiparangna parakatengon, ia niamrangara Shillong songjinmani wilwilaosan ong•aigen a•dokni Deputy Chief Minister Prestone Tynsong talatangaha.
Tynsong-ni parakatani gitade, sigimin manggisirangko galani bidingoba sorkari tom•e chanchirimangaha aro da•ontal sigimin manggisirangko salni 2:00 bajionasan galna on•na gita sorkari tik ka•angaha.

“Sigimin manggisirangko da•o salantian 2:00 baji ba una skangan galna nanggnok. Ian COVID man•e ba COVID man•gija sianggiparangnaba ong•gen aro ian Meghalaya a•dok gimiknan ong•gen,” ine Deputy Chief Minister parakataha.

Sombar salo Meghalaya a•dok gimiko sak 246 COVID man•daptaiahachim aro sak 6 manderang COVID man•e siangdapahachim. Meghalaya a•dok gimiko da•o COVID-19 man•e dongenggiparang gimik sak 1,884 gapskaengahachim.