Shillong, April 14: Meghalaya a•doko da•o dipet lockdown-ko ra•gatna nangani katta dongkuja aro Meghalaya Board of School Education (MBOSE)-ni ong•atrongenggipa Class XII porikkakoba a•doko April 16 tarik dipet ong•atna tik ka•somanahani gimin donsogimin somoi gitan ong•atangaigen ine Budbar salo, Meghalaya a•dokni Deputy Chief Minister Prestone Tynsong parakataha.
Deputy Chief Minister-ni parakatani gitade, da•o dipet a•doko lockdown-ko ra•gatna nangani katta dongkuja indiba obostarangko sorkari name nirikkienga.
Class XII porikkako donsogimin somoi gitan ong•atanggen ine talatangengon, porikka sechakgipa pilak centre-rangon COVID-ko chel•chakna dongimin niamrangko ja•rikanggen ine Tynsong parakataha.
Songadam nokadamrango COVID-19-ko warachakangna gita sorkari, joltangtangni dilenggipa dolrangko kam ka•attaina tik ka•aha ineba Deputy CM parakataha.
Tynsong-ni u•iatani gitade, COVID-19-ni tikarangkoba Health department, donsogimin pilak biaprangon su•engkua.
A•doko COVID-19 giprorona a•bachengtaiengaha ine janapatengon, manderangko chel•chakna gita sorkari pilak nanga ja•kurangko de•enga aro a•dokona re•baenggipa manderangkoba entry point-rango COVID-19-na porikka ra•e nisoenga ine Deputy Chief Minister parakataha.
Primary skulrangko chipatani gimin janapatengon, iani bidingo Education department, skulrangko chalaienggipa dingtang dingtang dolrang baksa agangrikenga ine Tynsong parakataha.
An•tangtangko naljoke rakkina man•na gita pangnan sorkarini dongimin niamrang jekai mask-rangko ganjringani, saksa sakgipinoni chel•tanggrike dongani, jakrangko jaksujringani aro uandakgipa niamrangko ja•rikjringchina gita Deputy CM, a•doko songdongenggipa manderangko didiangaha.
