Tura, April 5: Meghalaya Board of School Education (MBoSE), 2025 bilsini SSLC porikkani result-rangko sonibar salo parakataha, indake South Garo Hills a·ja 88.32 pass percentage-rangko man·enba, Garo Hills gimikko amgopaha.

Garo Hills-o dam 5 a·jarangni pass percentage-rangara : South Garo Hills-o 88.32%, West Garo Hills-o 80.50%, East Garo Hills-o 80.31%, North Garo Hills-o 75.76% aro South West Garo Hills-o 74.77% ong·a.

Ia bilsini SSLC porikkao, Garo Hills-o ni sak 13 chatro chatrirang Top 20 list-o bimung nadopaaha, uamangara 570 mark-rangko man·e 5-gipa biapko man·gipa Tura Sherwood School-ni Esther D Shira, Tura Casarina Public School-ni Ian Dongkam M Marak aro Tura St. Xavier’s Higher Secondary School-ni Bathsheba Ch Sangma, 569 mark-rangko man·e 6-gipa biapko man·rikaha.

Sherwood School-ni sak 43, Casarina Public School-ni sak 44 aro St. Xavier’s Higher Secondary School-ni sak 90 chatro chatrirang sakantian SSLC porikka seanio chu·sokaniko man·e 100% pass percentage-rangko man·gipa school-rangoni ong·paa.

Garo Hills-o gipin nambata mark-rangko man·giparangara, Tura Embee Rosebud HSS-ni Trishita Koch, Dalu St. Josph’s SS-ni Algado Thardy M Marak aro Bholarbhita Janapriya HSS-ni Musa Kazi, 568 mark-rangko man·e 8-gipa gadangko man·aha. Indake ong·engon, Tura Sherwood School-ni Shreyan Sarker 12-gipa aro apsan school-onin Arita Paul aro Pranjal Mishra 13-gipa gadangko man·aha. Aerovile Higher Secondary School-ni Afchida Viesa D Marak aro Tura Sherwood School-ni Ankit Modak, 16-gipa biapko man·skaaha. Tura Sherwood School-ni Trivayan Hajong aro Williamnagar Green Yard SS-ni Aganchi K Sangma, 17-gipa biapko man·aha.

Garo Hills-ni a·jarango badita sak porikka segiparangoni badita sak chu·sokaniko man·aha, sulsul u·iatenga :  South Garo Hills-o sak 3,298 segiparangoni sak 2,913 chatro chatrirang pass ka·aha. West Garo Hills-o sak 11,943 porikka segiparangoni sak 9,615 chatro chatrirang chu·sokaniko man·aha. East Garo Hills-o sak 3,226-oni sak 3,327 chatro chatrirang chu·sokaniko man·engon, North Garo Hills-o sak 4,391-oni sal 3,327 pass ka·angaaha. South West Garo Hills-o sak 4,563-oni sak 3,412 pass ka·aha.

Indake ong·engon, Khasi-Jaintia Hills baksa tosusagenchim ong·ode Garo Hills namen ja·man chakkuenga. Maina West Jaintia Hills-o pass percentage-ara 96.03%, Eastern West Khasi Hills-o 95.54%, South West Khasi Hills-o 94.93%, East Khasi Hills-o 92.54%, East Jaintia Hills-o 92.40%, West Khasi Hills-o 90.50% aro Ri-Bhoi-o 89.33% ong·a.

Na·simang ia video-koba nina man·gen: 

Na·simang iakoba poraina man·gen: Shillong-ni St. Margaret’s HSS aro Jowai-ni North Liberty, 2025 bilsini MBoSE SSLC porikkao chubatgipa gadangko man·a

na·simang hubnetwork.in, oniko video-ko niangan baksa poraina man·gen.

Chingko ka·mao mesokgipa social mediarango jarikna man·gen:-

Twitter- twitter.com/nemediahub