Shillong, Mar 31: Bilsi 50-na Assam aro Meghalaya a·dokni simarango meligrikgijanirangko namatna gita NPP-chi dilenggipa Meghalaya Democratic Alliance (MDA) sorkari, rakbee kamrangko ka·engon, sorkarini kamrangko matnangengani gimin Meghalaya a·dokni Chief Minister Conrad K Sangma aro Deputy Chief Minister Prestone Tynsong, All India Trinamool Congress (AITC)-ko raken jegalataha.
A·dok damgnini simarango meligrikna man·jaenggipa biaprangoni damdok jolrangko skanggipa bako namatna gita a·dok damgnini chief minister-rang, Union Home Minister Amit Shah-ni mikkango soi ka·grikangani ja·man, ia simarango donggipa Pillangkata, Maikhuli, Barapathar aro Iongkuli songbrini manderang baksade agangrikchenggija sorkari ja·kuko de·aha ine AITC-ni MLA Zenith Sangma matnangatahachim.
Indake ong·engon, AITC MLA-ni matnanganiko a·dokni Chief Minister Conrad K Sangma jegalatskaenba, batanggimin jadokni gisepo ia sorkari, agangrikna nanggipa pilak dolrangkon gronge agangrikaha aro simarango donggipa songrangonaba re·ange manderangni nangnikanirangko knae ra·chengesa nanga gita ja·kurangko de·aha ine parakataha.
A·dok damgnini simarango tom·tomaniko ra·bapilna kam ka·anio chu·soksranggipade ong·janaba gnang indiba dolgni sorkarirangan nambatgipa cholrangko niesa ja·kurangko de·aha ineba Sangma parakataha.
Apsan daken, a·dokni Deputy Chief Minister Prestone Tynsong-ba sorkarini kamko matnangahani gimin AITC-ni MLA Zenith Sangma-ko raken jegalataha aro ua an·tangde regional committee-ni membor-ba ong·pajani gimin ia kamko ka·ani bidingo mamingkon ma·sijawa ine matnangatskaaha.
Gitcham sorkarirang darangba iani bidingo ja·kuko de·jaha aro da·o MDA sorkarisa a·dok damgnini simarango meli nangrimaniko ra·bapilna gita ia ja·kuko de·aha ineba Tynsong parakataha.
