Shillong, Mar 8: Mongolbar salo, National People’s Party (NPP)-chi dilenggipa Meghalaya Democratic Alliance (MDA) sorkarini bilsibri gapaniko Shillong songjinmani U Soso Tham Auditorium-o maniangaha aro ia manianio, MDA sorkarini chu•sokatgipa dingtang dingtang kamrangni bidingo segimin report-ko a•dokni Chief Minister Conrad K Sangma aro gipin minister-rangni jakchi oprake on•angaha.
Ia apsan somoion, Meghalaya a•dokni skanggipa Early Childhood Development program baksana an•o donggipa me•chikrangko sorkarini sepangbatgipa health centre-rango dakchakaniko ra•na man•na gita miksonge ra•gatgipa Maternal Health Helpline ‘14410’-koba Chief Minister-ni jakchi a•bachengate on•angjolaha.
MDA sorkarini bilsibri gapaniko maniani bak gita, an•o donggipa me•chikrangni sianiko komiatna miksonge ra•gatgipa CM-ni Safe Motherhood Scheme-koba a•bachengate on•angaha aro iako a•bachengatanio a•dokni Health Minister James K Sangma-ba dongpaaha. Ia apsan salon, ASHA-rangni dormaharangko on•na ra•gatgipa ASHA Payment Gateway-koba Chief Minister, a•bachengate on•angaha.
Ia program-ko ong•atanio a•dokni Chief Minister baksana Urban Affairs Minister Hamletson Dohling aro gipin sakgni minister-rangni jakchi, chadamberangna ra•gatgipa ‘Aspire – 2 & Skills Meghalaya Program’-koba a•bachengate on•angaha.
Ia tom•anio a•dokni Chief Minister, jinmana aganprakangengon, batanggimin bilsibrina MDA sorkariko chalaianio dingtang dingtang kamrangko a•bachengatna man•aha aro songsalo janggi tangenggipa dingtang dingtang gadangni manderangna nangani kri dingtang dingtang program-rangko ra•gate on•na man•aha ine parakangaha.
COVID sajinmani a•sel ia sorkari, dingtang dingtang neng•nikanirangkoba chagrongna nangaha ine janapatengon, iandakgipa neng•nikani aro ra•bianirangko chagrongna nanggenchimoba ia sorkari, namroro silroroatani kamrangko ka•anio dontongjaha ine Chief Minister parakataha.
Ia sorkari, batanggimin somoirangona bate songadam nokadamrangoba bang•a manderangnan janggi tangani cholrangko on•na man•aha ineba Sangma aganaha.
Chief Minister-ni parakatani gitade, ia sorkari bang•a me•chikrangnan tangka paisani gita bilakbatataniko on•na man•aha aro dingtang dingtang nokdangrangna chi aro bijolikoba chu•onga gita on•na man•aha.
Game ge•e cha•enggipa manderangni namgnina MDA sorkari, dingtang dingtang program-rangko a•bachengate on•aha, sanna bannani kamrangko nambatataha, lekka porani kamrangko namdapataha aro uandake dingtang dingtang kamni a•barangoba ia sorkari nambatataniko ra•bana man•aha ineba ua aganaha.
Da•o bilsi 10-ni gisepon ia sorkari, Meghalaya a•dokkoba a•songo nambatsranggipa dam 10 a•dokrangoni damsa ong•atna kang•kare kaaha ineba Chief Minister parakataha.
