Shillong, Mar 2: Conrad K Sangma-ni dilenggipa Meghalaya Democratic Alliance (MDA) sorkarini kosako re•baenggipa Lok Sabha Election-o susagni gipin dolrang dongjani gimin, Meghalaya a•dokni dal•roroanio aro silroro namroroani kraa ramaon re•enga ine bebera•aniko Health Minister aro re•baenggipa Lok Sabha Election-o Shillong seat-na susagnigipa NPP-ni Candidate, Ampareen Lyndoh parakataha.

Sukrobar salo, kobor ra•timgiparang baksa agangrikengon, “Budget session-o gitalgipa budget-ni gimin CM-ni parakataniko an•ching niksona gita man•aha. Jechiba an•ching re•angbo, pilakchin namroro silroroaniko aro a•dokni tang•doataniko nikna man•engaha. Indake, batanggimin ja 7 mango, anga Rambrai-ona re•angon rama sorokrangni namgijagipa obostaosa nikeaha aro da•alo uarang, namen namgipa rama sorokrang ong•skaaha” ine Lyngdoh aganaha.

Indake, game ge•e cha•enggipa dolrangni, ge•e game cha•enggipa gadangrango namroroatanina aro skangna bate man•gnirangko tang•dobatatenganina mitelatan baksa, ia pilakon tang•doaniko mesokengani gimin, indide ia sorkarini kosako susagnigipa baosa ine ua sing•doataha.

Unbaksana, NPP-ni dilenggipa MDA sorkari, health sector, education sector aro tourism sector-rango tang•doatanio namen kamko ka•enga aro sorkarini kamo rakkiani bidingo niatgenchimode bang•a kamrangkoba nakatataha ineba Cabinet Minister agandapataha.

Indake, Shillong MP seat-na susaengani gimin janapengon, a•dokni manderangna aganchakgnigipa aro  ku•rang on•gnigipade MP-an ong•a aro bang•a a•dokni neng•nikanirangni gimin ma•mongo chanchirimna nanganirang gnang. Ia neng•nikanirangni bidingo, kakketgipa ramao Anga ku•rang on•gen ine Ampareen aganaha.

Unbaksana, social media-rango giproroenggipa koborrang, gisiko pilak jajrenganirang, UCC, CAA, a•songo toromni gita ong•gija a•gilsakni gita chelchaksoani, sima arirango meligrikgijani, a•songsaoni a•song gipinona bading chiwalanirang, iarang pilakan nangchongmotgipa obostarang ong•a. Indake, ia pilakni kosako kamko ka•na kragipa ine manderang seokgenchimode, anga pilakon somoi gita ka•e on•a kusi ong•a ineba ua agandapataha.

Indake iani gisepon, Shillong-ni Congress MP, Vincent Pala, a•dok aro ma•mong sorkarini gisepo, Shillong Parliamentary Constituency-ni maming nangrimani dongjaengani gimin, namdapatna gita nangenga maina, Chief Minister, a•dokni gipin Minister-rang aro MP-rang baksa apsan nangrimna nanga ineba ua aganangaha.

Na·simang ia video-koba nina man·gen:

Na·simang iakoba poraie nina man·gen: Shillong-Guwahati ramao Truck gari a•sel ong•e saksa sia

India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.

Chingko ka·mao mesokgipa social mediarango jarikna man·gen:-

Twitter-twitter.com/nemediahub

Youtube channel- www.youtube.com/@NortheastMediaHub2020