Tura, Nov 21: A·chikrangni daka rikanirangko mesokna gita salgittamna Babadam-o ong·atanggipa Me·gong Festival, Sonibar attamo ga·subee matchotangaha.
Ia bon·kamgipa attamo Shillong-oni mingsing minggamgipa ‘Soulmate’ dolni ga·subee gitrangko ring·e mesokani aro India a·song gimiko mingsinggipa Shenaz Treasurywala-ni sokachakanichi, ia Me·gong Festival-ko do·ga chipani ga·subatangaha.
Ia bilsio skanggipa changna ia Me·gong Festival-ko Babadamgre songo ong·atangahachim aro da·o COVID-19 sajinma adita namkalangengahani gimin sorkari, ia festival ba manianiko mikkang bilsi dipetde bilsiantian dal·bate ong·atna tik ka·angahachim.
Ia chang Me·gong Festival-ko ong·atanio Meghalaya a·dok baksana Arunachal Pradesh, Sikkim aro Assam a·dokrangoniba bakko ra·na re·batokaha aro an·tangtangni jakchi tarigimin cha·ani ringanirangko palna sim·na gita cholrangko man·tokaha.
TV program-rango mingsing minggamako man·gipa Shenaz Treasurywala-ni kobor ra·timgiparangna aganani gitade, ian uni gnigipa changna Meghalaya a·dokona re·baani ong·aha aro ua Meghalaya a·dokni rongtal an·talaniko nike namen aiao inmanbeaha. Uni India a·song gimikko wenanggipa biaprangoni Meghalaya a·dokan rongtalbatsranggipa biap ine ua nikaha ineba Shenaz aganaha.
Ia salgittamna ong·atanggipa Me·gong Festival-o jatni chrok mesaani, cha·susaani, jatni kal·susaani aro uandakgipa dingtang dingtang program-rangkoba ong·atangaha aro ia festival-ko ong·atna gita Meghalaya Tourism department, tangka paisarangko dakchake on·aha.
Me·gong Festival attamgittamon dingtang dingtang dolrangni git ring·e mesokanirangkoba nikangna man·aha aro ia dolrangara Nokpante, Katta, Da Suraka, Meba Ofillia, Soulmate & The Clansmen aro Fame the band ong·achim.
Iarangna agreba ia salgittamna ong·atanggipa Me·gong Festival-o a·gilsako mingsinggipa Lagota Circus-ni dakmesokani, jal·lik cha·susaani, sakkin cha·susaani, fashion show aro uandakgipa program-rangkoba nikangna man·aha.
Bon·kamgipa salo, dingtang dingtang susaanirango chegiparangna boksisrangko suale on·angjolaha.
Photos by Albert Sangma
