Tinsukia, Dec 17: Adita salrangna skang, Arunachal Pradesh a•dokni Kamle a•jao, bilsi 14 ong•gipa me•chik bi•sa saksako drae til•eka ine matnanga man•enggipa skulni principal-ko police-rang rim•e judicial custody-o donataha.
Koborko on•ani gitade, bilsi 14 ong•gipa skulni chatri saksako, re•anggipa December 12 tariko Raga-o donggipa Green Hills School-ni principal Bini Tegi, drae til•ekahachim. Iani bidingo me•chik bi•sani nokdang, Mongolbar salo police-rangna FIR ka•doangaha.
Ia a•selni bidingo koborko man•soa bakan Arunachal Pradesh a•dokni Kamle a•jao, manderang jinma ka•a ding•chaoe, ia principal-ko rim•china aro rakbatgipa sastiko on•china chrik a•boke dabiangtokahachim.
Indake ong•engon, matnanga man•enggipa skulni principal-ko police-rang rim•e, da•o ia a•selni bidingo am•sandianirangko dakengaha aro bakan kacharina report-ko on•gnok ine Kamle a•jani Superintendent of Police (SP) Rahul Gupta, Hub News-na parakataha.
“Drae til•ekako man•gipa me•chik bi•sana police-rang kakket bichalko on•na jotton ka•enga. Chingni am•sandianirangko chinga ta•raken matchotatgen aro dos dakgipa mandeni kosako bilak charge-sheet-ko ka•anggen,” ine SP parakataha.
Ia a•selni bidingo police-rang, Indian Penal Code (IPC)-ni 376(2) aro POCSO Act-ni Section 4 aro 6-ni ning•o mokordomako ka•aha ineba SP parakataha.
Matnanga man•enggipa principal-ko rim•ani ja•mano judicial magistrate first class-ni kachario mikkangpaataha aro ja•mano Ziro-ona judicial custody-o watataha.
