Shillong, June 9: MeECL-o kam ka·e neng·takgimin manderangni man·na nangkuenggipa tangkarangko on·na gita a·dok sorkari jotton ka·enga ine Budbar salo a·dokni Power Minister James K Sangma parakataha.
“Ia neng·nikaniko ta·raken namatna man·gen ine chinga ka·dongenga aro kamoni neng·takgimin manderangnaba chinga uamangni neng·nikanirangko niatna sorkari kam ka·enga ine parakna kusi ong·a,” ine Sangma, kobor ra·timgiparangna parakataha.
Batanggimin bilsi 11-na kam ka·giparangni terminal benefit-rangko on·chipgija donengani gimin Mongolbar salosan Coordination Committee of Registered MeECL Employees Associations & Unions (CCORMAU), a·dok sorkarini kosako FIR ka·na ka·mikkenatahachim ine nikna man·a.
Indake ong·engon, MeECL-o kam ka·e neng·takgimin manderangni man·na nangkuenggipa tangka paisarangko sorkari on·na jotton ka·enga ine a·dokni Power Minister parakataha.
Iani bidingo talataniko on·angengon, Meghalaya State Electricity Regulatory Commission-ni gita terminal benefit-rangko tarina on·jahani a·sel kamoni neng·takgimin manderangna MeECL, ia terminal benefit-rangko on·na man·chipjaha ine Sangma parakataha.
“Iani bidingo chinga ru·uta sal somoirangna skangonin name am·sandiengachim aro iako name am·sandina gita a·dokni Advocate General-na on·ataha. Iani bidingo Power department-ba finance department baksa agangrikengkua,” ine Power Minister parakataha.
