Shillong, Nov 3: Pangchakani ro•ongko songani somoio, a•doko skia porani nangchongmotgipa ong•aniko aganan baksa Meghalaya Youth Policy-ko man•chape aganjolaha.

“A•doko chadamberangko bil sikate dingtang dingtang gadango jakkalanichisa namgnirangko bang•bate ong•katna man•gen” ine Pa Conrad Sangma, Youth Policy-ko bimang ong•atanio ga•chate aganaha.

Chadamberangko uamangni namnikgipa a•jao skie ra•na chol on•a nangchongmotaniko janapengon, “Chinga chadamberangna pangchakaniko done uamangni nangnika a•jao skie ra•na chol on•gen. Beben iarangna koros ka•na nanggen indiba sorkari man•a dipet chadamberangko uamangni namnika a•jao changa sapanirangko nambatatna chol on•a sikenga” ineba A•dokni skotong  Minister agandapaha.

“Chadamberangko nama ramako dilatna man•ode, uamang kamna choligipa, dai ra•e janggitanggipa, bimchipe kam ka•gipa, a•songtangna ka•sagipa ong•chongmotgen ine niksamsoe chinga sorkarini gita ka•dongsoenga” ineba ua aganaha.

A•dokko skia porako gital bimang ong•atani gimin aganengon ” Chinga a•doko skia porani a•jako gital bimangona ra•bana kingkot kam ka•enga aro ian chingna namen ra•beani indiba chinga ianan on•kangmanchaenga. A•bachenggipa skia porani gadangko dingtangsranggipa bimangona ra•banan tangka gong kror 2500-ko koros ka•na nangenga” ineba skotong minister aganaha.

“Chinga a•dokni dam 3000 mang a•bachenggipa gadango skie on•chakramrangko niaha aro iano 70 percent-de galchipgimin ine nikna man•aha mitamrangde da•onan wa•seni noksan aro mitamrangode kelkimangmangba dongpagijagipa skul nokrangba dongkuenga. Mitamrangode asongchake ba lekka kitap donchakanimangmangba dongkujaenga” ineba ua talataha.

“An•ching bi•sarangna dingtanganiko ra•bana banonibade a•bachengna nangchongmotengaha” ineba ua agandapaha.