17.8 C
Tura

Isreal a•song baksa nangrime ge•a gamaniko Meghalaya a•dok a•bachengata.

Must read

Shillong, Nov 3: Isreal a•songoni India-ona Ambassador ong•e re•bagip Dr Ron Malka jean dao a•dokni skotong songjinma Shillong-o ong•engachim, ua “Israel aro India a•songrangni gisepo meli nangrimanirang nambatroroenga” ine aganangan baksana Meghalaya A•dok Sorkari baksa bakrime mesu aro biterangko nambate ge•a gamanirangko dakangna damgni centre rangko Jongksha, East Khasi Hills aro Dawagre, East Garo Hills o kuliangana am•anikoba parakangjolangaha.

A•dokni Skotong Minister Pa Conrad K Sangma aro Agriculture Minister Pa Banteidor Lyngdoh ni dongpaanio media-na Dr Malka agantalatangaha. Media baksa agangrikaniko dakna skang Pinewood Hotel, Shillong-o, Meghalaya aro Israel ni nangrime kam ka•angani bidingo agangrikaniko dakangskaahachim.

Agangrikani ja•pangde a•doko  ‘centre of excellence’- rangko a•bachengatanian ong•a’ ine Pa Conrad Sangma ui•atangan baksa India aro Israel iandakgipa agriculture aro horticulture na centre-rangko a•songni dingtang dingtang biaprango aro Northeast a•jarangoba kuliangaha ineba ui•atangaha.

A•doko centre rangko kulianiko janape “Centre of excellence ko a•doko kulina agangrikanirang namen tang•doaha” ineba Pa Sangma aganaha.

Ian nangchongmotgipa ong•a maina ge•a gamanirango technology ko jakkalaniara mingsa nangbegipa ong•a aro a•doko ge•a gamani biterangko niatgenchimode technology aro am•sandirikitanirang komiani a•selo an•ching biterangko kraagita man•a amja aro ge•gipa gamgiparangna nambata cholkoba on•na manja’ ineba Pa Sangma agandapangaha.

Agriculture technology o jakrikra ong•enggipa Israel a•song baksa nangrime kamko ka•anichi an•ching an•chingni ge•gipa gamgiparangna nambata chol aro ramarangko mikkangchi nambate on•angna man•gen ine ka•donga ineba Pa Sangma parakaha.

Meghalaya a•doko bolam bite aro ge•a gamani biterangko nambate ge•na gamna cholrang namen nama aro uamang ge•gipa gamgiparangna uamangni ge•a gamanirangko namdapatna dakchakna miksonganirang donga aro ian A•songni Prime Minister Narendra Modi ni niksamsoaniba ong•a ineba aganangaha.

More articles

-->
-->

Latest article