Shillong, Naitung 03 : Ka Executive Committee ka Voice of the People Party (VPP) ha Khasi Hills Autonomous District Council (KHADC) kala pyndam noh ia ka lisen pyniathoh (marriage licence) bala ai sha u Bah Macdonald Pyngrope hadien ka jingweng noh ia ka jingkyntang pastor ia u da ka Khasi Jaintia Presbyterian Synod Sepngi.

Ha ka hukum ba pynmih ha ka 26 tarik Jylliew, ka Executive Committee ka ong ba ia kane ka rai la shim hapoh ka kyndon 3 bad 4 jong ka United Khasi-Jaintia Hills District ( Christian Marriage) Act, 1954, pule lang bad ka kyndon 6 jong ka Indian Christian Marriang Act, 1972, kaba aibor ia ka KHADC ban ai bad pyndam ia ki lisen pyniathoh hapoh ka Khasi Hills Autonomous District.

Ia kane ka kam la leh hadien ka jingujor bala aiti da ka Khasi Jaintia Presbyterian Synod Sepngi ha ka 28 tarik Naiwieng, 2025, kaba kyrpad ban pyndam noh ia ka lisen u Bah Pyngrope halor ka nongrim ba ka Balang kala weng noh ia ka jingpynkyntang pastor ia u bad ba ka Balang kam shym la ithuh shuh ia u kum u Pastor ban pynkyntang ia ki jingiathoh shongkurim”.

Kat kum ka hukum, ka EC kala ai ia ka notice sha u Bah Pyngrope, ula la phah ia ka jubab da ka jingthoh ryngkat bad ki kot ki sla ba u shaniah.

Ka EC ka ong “kala shong pyrkhat bha bad bishar ia ki jingthoh bad ki kot ki sla bala aiti na ka KJP Synod Sepngi, ka jubab u Bah Macdonald Pyngrope” hynrei ka hukum ka pynshai ba ka KHADC ka khlem shong bishar ia ki rai ba hapoh iing jong ka Balang.

“Ki kam ba iadei bad ka jingpynkyntang, jingsospon lane weng noh ia ka jingpynkyntang Pastor ka dei ka kam Balang kaba hap beit thik tang hapoh u pud u sam ka KJP Synod Sepngi” kala pynpaw.

“Ka Executive Committee kam tuklar lane pyndonkam ia kano kano ka bor ban bishar ia ki kam niam lane ka jingpyniaid ia ka kam Balang” kala ong.

Hynrei, ka EC ka sngew ba ia ka lisen pyniathuh la ai sha u Bah Pyngrope “kum u Pastor bala ithuh bad bala pynkyntang ba un pynkyntang ia ki jingiathuh Khristan. “Da ka jingpyntip ka Synod ba la weng noh ia ka jingpynkyntang Pastor ia u, ka nongrim jong ka lisen pyniathuh bala ai sha u kam treikam shuh” ong ka hukum.

Namar kata, haba pyntreikam ia ka bor bala pynkup hapoh ka kyndon 3 bad 4 jong ka United Khasi-Jaintia Hills District (Christian Marriage) Act, 1954, pule lang bad ka 6 jong ka Indian Christian Marriage Act, 1872, ka Executive Committee ka pyndam noh ia ka lisen pyniathoh bala ai sha u Bah Macdonald Pyngrope ka ban treikam noh mardor.

Ia kane ka hukum la pynmih da u Executive Member ba khmih ia ka Tnad Law & Legal Matter bad ka Elaka Administration jong ka KHADC.

Pule ruh : Kyntur ka sorkar ia ka kyndon 5 hectare bad ka jingtih dewiong scientific ba iahap bad ka thain

Peit ruh :

Wad ia ki khubor ba dang shu jia na man ki jaka kyndong ka thain Shatei Lam Mihngi ha hubnetwork.in, ka tyllong khubor online jong phi ban lap ia man ki khubor ba dang jia, ki jingring durkhih.

Bud ruh ia ki ha ka

Twitter – twitter.com/nemediahub

Youtube channel – www.youtube.com/@NortheastMediaHub2020

Instagram – www.instagram.com/ne_media_hub

Download ia ka app jong ngi na playstore – Northeast Media Hub