Shillong, Jylliew 29: Ka MLA ka Sutnga-Saipung constituency ka Kong Santa Mary Shylla ka la ong ba ka Sorkar Jylla ka dang kyntur ban don ka jingtih dewiong katkum ka juk saian mynta ha Meghalaya bad ka la pan jingmynjur na ka Sorkar Pdeng ban pyllait ia ka jingdonkam jaka na ka 100 hectare sha ka 5–10 hectare.

Haba kren sha ki lad pathai khubor ka Kong Santa Mary ka la iathuh ba dang shen la don ka jingialang bala khlieh da u Myntri Rangbah ka jylla u Conrad K Sangma, haka jingdonlang ki nongtih bad nongkhaii dewiong ban iakren ia ki lad ki lynti ban ioh tih dewiong biang ki trai par dewiong barit.

“Ngi la don ka jingiakynduh bad u Myntri Rangbah ka Jylla bad ka kynhun ki coal miners and dealer association. Ka sorkar ka thrang bha ban iaid shakhmat ban tih dewiong da ka juk stad mynta (Scientific Mining)” la ong ka Kong Santa Mary.

Ka Kong Santa Mary ka la ong ba ia kane ka jingtyrwa ryngkat bad ki kot ki sla la dep ban buh hakhmat ka Sorkar Jylla. “La aiti ia ka dorkhas bad ngi la pyni da kiwei ki lad ban tih dewiong sha ka sorkar, u Myntri Rangbah u la shim ia ki jingai jingmut, bad ki ophisar ki la don lang ha katei ka jingialang” kala ong.

Ka jingai jingmut kaba kongsan ka long ban pynlong ia ka jingtih dewiong da ka juk stad mynta kaba lah ban treikam na ka bynta ki nongtih dewiong trai ri da kaba pynduna ia ka jingpynjot iaka mei mariang.

“Ka jingai jingmut ka long ban pynhiar ia ka jaka na ka 100 hektar kaba mynta sha ka 5 haduh 10 hektar, katkum ka jinglah ban tih dewiong katkum ka juk stad mynta” kala batai.

Haba pynpaw ïa ka jingeh ha ka liang ka ioh ka kot ha East Jaiñtia Hills, ka Kong Santa Mary ja la kyntu ïa ka Sorkar Pdeng ba shimkhia mardor iaka jingtyrwa ka Sorkar Meghalaya.

“Ki paidbah jong ngi ki la shem jingeh ha kine ki lai ne saw bnai ba la dep. Ki ia kynduh shibun ki jingeh, ngi kyrmen ba ka Sorkar India kan shim khia bha ïa kane ka kam bad kan mynjur ïa kane ka jingtyrwa” ka la ong.

Ka la bynrap ba ka jingkylla sha ka jingtih dewiong da juk stad mynta kan weng ruh ia ki jingeh ha ka jingshngain jong ki nongtih dewiong.

“Ngi wad ia ka jingtih dewiong kaba duna ka jinglut jingsep namar ka rukom tih dewiong tynrai ne Rat Hole Mining ka long kaba eh bha bad kaba don jingma, kane ka long na ka bynta ka jingmyntoi jong ki paidbah” ka la ong.

“Baroh ki kot ki sla kiba biang ngi la pynkhreh bad aiti. Ngi ieng ryngkat bad ki paidbah bad ryngkat bad ka jingtih dewiong tynrai, lane kano kano ka kyrteng kaba la ai ka rukom treikam kaba thymmai. Ngi don ryngkat bad ka”, ka la ong.

Ka Kong Santa Mary kala pynpaw ka jingshaniah ha ka jingpyrshang jong u Myntri Rangbah ka Jylla ban ïoh ïa ka jingbit naka Sorkar Pdeng. “Ngi kyrmen ba ka Sorkar Pdeng kan mynjur ban pynduna ia ka jingdonkam jaka sha ka 5 hectare. Nga thikna ba u Myntri Rangbah jong ngi un lah ban rah ia kine ki jingai jingmut shaka Sorkar Pdeng. Ngi khmih lynti sha u ba un ai ka lad ban pynbeit na ka bynta ki paidbah ka East Jaintia Hills”, ka la ong.