Sohkha, Naitung 3: Ka Sorkar Jylla kala pynksan ba ka jingioh kyrdan ba shatrai jong ka Meghalaya ha ka National Performance Grading Index (PGI) 2.0, ka dei namar ba ka jingai kyrdan kam pyni beit satia ia ka jingkiew ka pule puthi ha Jylla bad ong ka daw hi ka mih namar ka jingduna ha ki rukom ai jingtip na ki skul.

U Myntri Rangbah ula pynpaw ia kane haba ai jingkren ha ka jingialang buh mawnongrim ka Sohkha Government Higher Secondary School bad ka jingpynkup burom ia ki khynnah skul kiba pass bha.

U Myntri Rangbah ula pynpaw ba ki jingduna ha ka jingai jingtip ia ki jingkhein jingdiah kala lam sha ka jingduhnong kaba khraw ha ka rukom khein ia ka PGI.

“Sngewsih, ka kyrdan kaba paw ha ka PGI kam dei ka jingpynpaw kaba hok ia ka pule dangle ka Meghalaya. Kane ka mat kam dei tang halor ka jinglehbha, hynrei kumno ngi ai jingtip ia ki” ula ong.

Ula kdew ba ki dak kiba pyni ia ka jinglah treikam, kum ka jingdon ki jaka pulekot lane ki prokram ai jingpynsngewthuh kum ka Cyber Safety ne jingshngain ka Cyber, ki dei ki bym shymla ai jingtip bha da ki skul, kaba lam sah ka jingduhnong ha ka jingai marks.

“Ha kiba bun ki khep, ki jingpyrshang kiba rit kum kajingpynlong iaki prokram ai jingpynsngewthuh ba shisngi lane ai jingtip ha ka rukom kaba dei ia ki jingdon ki kor ki bor ki lahban pynioh ia ngi ia ki point kiba donkam. Ngi la duh jan 100 marks namar ka jingduna ha ka jingiapei bha ban iakren bad ban ai jingtip” ong u Myntri Rangbah.

Da kaba shim ia kane kum ka lad pynbeit kiba suk, ula kyntu ia ki Khlieh pyniaid jong ki skul bad ka Tnad Pule Puthi ban pynleit jingmut ha ka jingai jingtip kaba beit bad ha ka por kaba biang.

“Kine ki dei ki kam kiba suk, hynrei ki donkam ia ka jingshimkhia. Lada ngi pynkhlain ia ka rukom ai jingtip, ka kyrdan PGI jong ngi kan kiew bha” ula bynrap.

U Myntri Rangbah ula iai ban ba ka Sorkar kala leh shibun kiei kiei ha ka kam pule dangle ha kine ki phra snem bala leit noh, kynthup ka jingshna pynbha ia palat 2000 tylli ki skul, kynshew bun bah ha ki jingeh, pynbha ia ka jingpass ki khynnah ha ka eksam SSLC kaba kot ia palat 95% ha ki snem bala leit.

“Ki jingkylla kila jia. Na ki jingtei sha u soh, ngi la iaid ha ka lynti kaba dei. Mynta ngi hap ban pynthikna ba ka jingkiew jong ngi kan dei kaba la ioh jingkhein bha bad ba kan paw” ula ong.

Ula kular ia ka jingkyrshan ba dang bteng jong ka Sorkar ban pynkhlain ia ki jingtei jong ka skul, pynbha ia ki lad pyniasoh bad pyniar ia ki lad ki lynti ha ka kam pule puthi ha kylleng ka Jylla.

U Myntri ka Tnad Pule Puthi Bah Lehkmen Rymbui bad Myntri kam ialehkai Bah Wailadmiki Shylla, kila iadonlang ha kane ka prokram.

Kane ka jingialang ka dei ruh ka dak jong ka jingplie ia ka Children and Adolescent Library bad ki kor digital ha shnong Sohkha Mission, kaba pynskhem biang ia ka jingkut jingmut jong ka Sorkar ban kyntiew ia ka pule puthi ha baroh ki liang.

Pule ruh : Dawa ka HNLC ia ka EC ka VPP ban weng noh ia ka Land Bill ka KHADC

Peit ruh :

Wad ia ki khubor ba dang shu jia na man ki jaka kyndong ka thain Shatei Lam Mihngi ha hubnetwork.in, ka tyllong khubor online jong phi ban lap ia man ki khubor ba dang jia, ki jingring durkhih.

Bud ruh ia ki ha ka

Twitter – twitter.com/nemediahub

Youtube channel – www.youtube.com/@NortheastMediaHub2020

Instagram – www.instagram.com/ne_media_hub

Download ia ka app jong ngi na playstore – Northeast Media Hub