Shillong, Jan 31: Saksa veterinary doctor aro sakgni dakchakgiparangko dolprakna seoke, do·oni sabisi ong·katengani bidingo niroke kamrangko ka·angna gita Meghalaya a·dokni gimik ge 46 block-rangona dol 138 Rapid Action Team-ko Animal Husbandry department songaha.

Iako dakaniara do·o jile cha·giparang baksa melie kamko ka·e do·oni sabisiko nirokatna gita ong·a ine aganengon, do·oko jile cha·enggiparang baksa melie kamrangko ka·e somaiantio uarangko nirokatna man·na gita aro do·oni sabisiko man·bebeoba uni saani rokomrangko maidake u·ina man·gen iani gimin uamangna agan-skie on·na gita chinga ia dolrangko dingtangmancha bikotaha,” ine Veterinary & Animal Husbandry-ko nirokatenggipa Principal Secretary, Pa GHP Raju agan-talataha.

Do·oni sabisi giprorona kenchake, a·doko do·orangni sienganiko nirikkiatna gita donatako man·giparangba block ge·antion da·o kamrangko ka·enga. “Bajar-antirango survey ka·aniko chinga da·odipet dakatkujaienga indiba koborrangko man·ani gita poultry-oni do·orangko cha·na maming kenani dongja ine ka·dongen agana man·gen ineba Pa Raju taldapataha.

“Do·o be·en aro do·chirangko cha·anio jajrengna nangani dongja ine manderangna ma·siate on·na gita chinga media gita u·iatanirangkoba on·enga, ine Pa Raju aganaha.

Da·odipet, Meghalaya-o aro salgro-salaramni gipin a·dokrango do·oni sabisiko man·ani maming chinkon man·sokuja ine aganenon, “Assam, Tripura aro Mizoram sorkariba ia mamlao bimchipe kamrangko ka·atengani gimin da·odipetde salgro-salaramo do·o saani mamila soka dongkuja aro Meghalaya a·dokni ge 46 block-rangon dol 138 Rapid Action Team-ni manderang do·oni saaniko nirikkienga. Unbaksana, konta 24 na kingking dakchakanirangko on·ani nomborrangkoba chinga kulliaha,” ine Pa Raju agandapaha.

Ja·pangoniko do·orangko Assam gita ra·napbaaniko da·oba champengangkuenga, indiba a·doko da·omangba do·orangde chu·onga gita dongaienga ine principal secretary talataha.

Indake ong·oba, manderangni do·o be·en cha·aniba aditan komiskaaha ine aganengon, “An·chingni biaptango, wilwilao jilgipa aro private kulligipa poultry nokgiparango gimik million 50 mang do·orang gnang jemangan lak 4 mang do·orangko chimonge donenga.

Department-oba ge 12 poultry farm-rang gnang jerangon mang 30,000 do·orangko jilenga, uni gimin a·doko chu·onga gitan do·orang aro do·bitchirang gnang,” ine Pa Raju talataha.
Janapjolna gita, India a·songona do·oni sabisi sokbagitikani gimin, do·o, do·bitchi aro do·o be·enrangko a·dokona ra·napbaaniko Meghalaya sorkari champengataha aro ia niamko da·oba raken ja·rikangkuenga.