Shillong, July 25: Ru·uta somoirangoni ka·donge nichaksoenggipa tom·ani, chong·motan Meghalaya a·dokna ILP-ko dabienggipa dolrang baksa ma·mongni Home Minister-ni gisepo agan-golpogrikani ianpakoba bite gnanggipa ong·taijaha.
ILP-ko dabienggipa dolrang baksa ian ma·mongni Home Minister Pa Amit Shah-ni gnigipa chang gronggrikaniba ong·achim. Gronganggipa dolrangara — Khasi Students’ Union (KSU), Confederation of Meghalaya Social Organisation (CoMSO), Federation of Khasi-Jaintia Garo People (FKJGP), Ri-Bhoi Youth Front (RBYF) aro Hynniewtrep National Youth Front (HNYF) aro gipin dolrang.
Home minister-ko grongani ja·man uamangni chu·ongnikgijaniko koborna agananio, a·doko ILP-ko ra·gatani bidingo chinga aganpana cholko man·ahaoba iani gimin Home Minister-ni ku·sikoniko maming ku·rachakaniko aro aganpaaniko knarikjae namen suk ong·ja aro ia dabienggipani gimin ma·mong sorkari maiko chanchiahachim uko chinga ma·sija ine KSU-ni padot Lambok Marngar aganangaha.
A·dokni chong·motgipa jatrangni ku·rangko knachakchina gita ma·mong sorkario su·dodoaniko dakangkuani gimin ILP-ko dabienggipa dingtang dingtang dolrang baksa uamang grongtaienba mikkangchi ja·kurangko de·atani gimin chanchirimanggen ineba ua agandapataha.
Tom·ao bak ra·gipa dolgipin FKJGP-ni padot Wellbert Rani-ba an·tangni suk ong·gijaniko parakange, chinga gimikna minit 20 ba minit 30 somoiko on·gen ine ka·dongataniko on·ahachim indiba ma·mongni home minister uamangoni bang·batanan tom·ao agan-pana gita cholko on·jaha ine janaptan baksa, chinga ia mamlani gimin home minister maikobade agantelgen ine ka·dongprete re·baahachim, indiba ka·donggramaiaha ine ua agandapataha.
Meghalaya-o ILP-ko ra·gatgen ba ra·gatjawa uamangni chanchiako mangmangde ma·mong sorkari chingna u·iatna nangachim ine janapatan baksa, CoMSO-ni chairman Robertjune Kharjahrin-ni aganani gitade, tom·ao dongpagipa a·dokni skotong minister-ba iani gimin uamang chanchigen ine janapataha, indiba chinga home minister-ni ku·sikonikosa knana nangnikachim. HM, a·dokni chong·motgipa jatrangni maanko rakkijaha indiba chingni ka·donganiko chinga watgaljawa aro iana bate rakbaten ja·kurangko de·angskagen ine Kharjahrin parakatjolaha.
Janapna gita Confederation of Meghalaya Social Organisations (CoMSO) aro gipin organisation-rang Meghalaya a·doko ILP-ko ra·gatchina gita Congress dolchi sorkariko rikmitingonin dabibaengachim jekon 2013 bilsio iako ra·chakgija uni palo Meghalaya Residents Safety and Security Act (MRSSA)ko 2016 bilsio sorkari ra·chakangskaaha.
