Shillong, Sept 17: Meghalaya a•dokni itihaso MDA sorkarian biapko on•batsranggipa sorkari ong•a ine Sukrobar salo, Meghalaya a•dokni Chief Minister Conrad K Sangma, Assembly-o parakataha.
Assembly-ni session-o ‘sorkarini chu•sokgijanirangko’ opposition dolni kan•dike chanchirimdilanina aganchakaniko on•angani somoio Chief Minister ia kattarangko aganaha.
Skango ong•anggimin sorkari aro MDA sorkarini kamrangni bidingo tosusae aganangengon, “Chingni sorkari apsan chanchirime kam ka•aniosa bebera•a. Agangrikanichisa namatani cholkode man•a ine chinga bebera•a,” ine Chief Minister aganaha.
Chief Minister-ni aganani gitade, Congress sorkarini somoio dingtang dingtang project-rangko ra•gatgenchimoba tangka paisarangkode chamskajachim aro ia project-rangko da•o MDA sorkarisa kolampile chu•sokatskaengachim.
2022 bilsio matchotna sienggipa gital Assembly nokko MDA sorkarisa rikna gita kang•kare kaaha ineba Chief Minister aganaha.
A•doko namroro silroroaniko ta•rakbatatna gitasa miksonge MDA sorkari kamko ka•enga ine janapatengon, a•doko koros ka•ani 2017-18 bilsirango gong kror 9000-sanchim indiba 2020-21 bilsio gong kror 14,000-ona tang•doangaha ine Sangma parakataha.
Meghalaya a•doko da•o gong kror 8000-na baten Externally Aided Project (EAP)-rangko jakkalenga aro ian tangka paisarangko name jakkalaniko mesokani ong•enga ineba Chief Minister aganaha.
Sorkarini a•bachengatgipa dingtang dingtang kamrangni gimin janapangengon, darang gipin sorkariba game ge•e cha•enggiparangni namgnina chanchijachim indiba MDA sorkari, game ge•e cha•enggiparangni namgnina chanchie Farmers Collectivisation for Upscaling Production Marketing System (FOCUS) program-ko a•bachengataha ine Sangma parakataha.
A•doko organic mission, agar mission aro livestock mission gita dakgipa dingtang dingtang program-rangko a•bachengateba ia program-rangko chu•sokgipa ong•atjaha aro ia program-rango badita tangka paisarang koros ong•ahachim maming see rakkianirangba dongjaha ineba ua gitcham sorkariko matnange aganangaha.
A•dokni namroro silroroanina gitcham sorkarini chu•sokgijanirangko ia sorkari namatskaenga ineba Sangma aganaha.
