Shillong, Oct,29 : Meghalaya, South West Khasi Hills district-oni rong·mesak bang·gipa biap Kyllengp-Pyndengsohiong-Mawthabah-oniko bikotna gita de·e-minge ra·baaniko raken champengsoanio kim·kime donganggipa Nonagenarian Spility Lyngdoh Langrin minggipa bilsi 95 gape a·gilsakko watangaha.
Adita chasongrangna skang, Domiasiat a·jolo a·atango rong·mesak donggipako cho·e bikotna bang·bea tangka-paisarangko on·aniko man·genchimoba “Angni jakgitelaniko tangkachi brena amjawa,” ingipa namen gamchatbea kattarangko sianggipa ma·gipa aganahachim.
Ru·uta bilsirangna skango South West Khasi Hills district-oni bang·a biaprangon cho·e niani kamrangkoba a·bachengatahachim. Ua somaio rong·mesak bikotani kosako jegalanio, Khasi Students’ Union (KSU) mikkango donge adita dingtang-dingtang dolrangko Meghalaya a·dokoniko rong·mesak bikotaniko aro cho·e niani kamrangko raken jegaldilangskaaha.
Batanggimin somaio, South Khasi Hills district-ni Kylleng-Pyndengsohïong-Mawthabah joloniko rong·mesak bikotna gita Ma·mong aro Uranium Corporation of India Limited (UCIL) proposal-ko on·ahachim. 9.22 million ton-rangni gita rong·mesak (uranium ore) Meghalaya a·doko gnang ineba janapani gnangchim.
Uni siani koborrangko man·soenba, bilsi 95-ong·gipa buchumani a·gilsakko watanganina duk ong·paaniko aro kalimpaaniko KSU uamangni Twitter-o see parakataha.
“Meghalaya a·doko rong·mesakko drae bikotna am·gipa UCIL aro uni agent-rangni kosako ua krenge jegaldilaha. Ua da·o an·chingni gisepo dongjajok, uni janggi tom·tomao neng·takchina,” ineba union janapataha.
