Shillong, Oct 13: Dingtang dingtang dolrangni kusi ong•gijaniko parakahani gimin Meghalaya Regulation of Gaming Act 2021-ko den•galpilna gita Bristibar pringo, Meghalaya a•dokni Taxation Minister James K Sangma tik ka•angaha.
Iani bidingo jinmana u•iatengon, Meghalaya Regulation of Gaming Act 2021-ko donanichi kragijagipa kamrang ong•naba gnang ine dingtang dingtang dolrang jegaltokahani gimin a•dokni namgnina ia niamko den•galpilna tik ka•aha ine Taxation Minister parakataha.
Sangma-ni parakatani gitade, Gaming Act 2021-ko ra•gatani mongsonggipa miksonganiara a•doko Tourism-ko tang•doatna, kajina man•aniko bariatna aro a•dokni manderangna janggi tangani cholrangko on•na miksonganisa ong•achim aro Casino-rangkoba gipin biaprangoni re•baenggipa manderangnasan kulina miksonganirang dongachim.
Indake ong•genchimoba, dingtang dingtang toromni dolrang, NGO-rang, songko nokko dilenggiparang, chadambe dolrang aro uandakgipa dingtang dingtang dolrang baksa chanchirimanio pilakan ia niamko jegaltokahani gimin sorkari, pilakni namgnina chanchie ia Meghalaya Regulation of Gaming Act 2021-ko den•galpilna nangnikaha ine Sangma parakataha.
