Shillong, July 18 : Mandeni janggi tanganiko tang•dobatatna ja•ku de•anio, Meghalaya a•dok sorkari aro Indian Institute of Management Shillong (IIM Shillong) budbar salo Memorandum of Understanding (MoU)-ko soi ka•grikaha.

Ia ku•rachakgrikaniara, jolo donggipa manderangni janggi tanganiko tang•dobatatna gitalgipa ja•ku de•aniko mesoka, jekon Meghalaya a•dokni Skotong Minister Conrad K Sangma aro IIM Shillong-ni Board of Governors-ni Chairman Shishir Kumar Bajoria-ni dongpaanio dakataha.

Ia soi ka•grikaniko, namen gisik ra•na krabegipa sal chongmotan, U Tirot Sing Syiem-ni chang 189-gipa siani salo, uni jatna janggitangko on•chakani aro namgipa dilgipa ong•aniko mande ra•ani bak gita ia salo soi ka•grikaniko dakangaha. IIM Shillong-ni Director, Prof. D. P. Goyal aro Meghalaya sorkarini Secretary Cyril V Diengdoh, Planning, Investment Promotion and Sustainable Development Department, officially MoU-ko soi ka•grikaha.

Ia ku•rachakgrikanio, dakna am•ani bil ba changa sapaniko nambatatani, dilna ong•ani gunko tang•dobatatan baksana a•dok sorkari aro IIM Shillong-ni gisepgriko kam ka•anirango bakrimaniko nambatatna miksonge ja•ku de•anirangko mesoka. Ia ku•rachakgrikani ning•o man•chapgiparangara :

1. Skotong Minister-ni State Business Plan Competition (College Level) : Ia susagrikaniko ong•atani miksonganiara, Meghalaya a•dokni chatro chatrirangni gisepo bading chiwale cha•aniko gisiko chaoatna aro pangkamgipa bading chiwalani bewalrangko ra•dona miksonganian ong•a.
2. Capacity Building and Global Leadership Programs : Ian sorkarini ning•o kam ka•gipa officer-rangna dingtangmancha tarigipa ong•skaa, jean uamangni changa sapani ba u•ianiko aro dilgipa ong•ani gunko apalbatatenba mikkangchina pangkamgipa namroro silroroaniko ra•bana gita kam ka•giparang ong•na man•gen.
3. Management Development Programs : Ian dingtangmancha Autonomous District Council-na tarigimin ong•a, ia program-ni miksonganiara administrative aro sason ka•ani bidingo pangchakani ba dakchakaniko on•a miksongani ong•a.
4. Live Projects for IIM Shillong Students : Chatro chatrirangna dake niani cholko on•ani, ia project uamangna dingtang dingtang sorkarini department-rang aro block office-rang baksa apsan kamrangko ka•na gita cholko on•an baksana a•gilsako ong•enga obosta ba neng•nikanirangko chagrongani bidingo u•ie ra•na gita cholko man•gen.

Bilsi 16-na ia institute-ni lekka pora skie ra•anio on•gilani gimin gisiko nange aganengon, namen gamchatbegipa academic research ba am•sandie niani aro dingtangmanchagipa skie on•ani bewalrangko jakkalenba, Meghalaya a•dokko namroro silroroatna ba tang•dobatatanio on•gilani giminba ua aganangaha. Una agreba, da•o ma•mongni gita ong•atenggipa Community Impact and Engagement for the North East (NE-CCIE)-ko mesoke on•angaha, jean songsal baksa apsan ku•mong nangrime kam ka•enba songsalko namroro silroroatna kam ka•na miksonganian ong•a.

Shishir Kumar Bajoria, sorkarini dakchakaniko man•ani aro ia institute-ni namroro silrorobaani bidingo aganengon, re•baenggipa sal somoirango MoU-ni gamchatani giminba ua aganangkuaha.

Ia salo, a•dokni Skotong Minister Conrad K Sangma, a•doko songalni gita neng•nikanirangko man•enganiko namatna gita ja•ku de•na nangchongmotani gimin aganangskaaha.

Ua a•doko songdongkamgipa manderangko ra•dona gita ja•ku de•nirang jekai CM Connect Scheme, CM Entrepreneurship Challenge aro an•o donggipa ma•arangni sianiko komiatna jotton ka•ani bidingoba u•iatangaha.

Skotong Minister, re•baenggipa sal aro somoirango Meghalaya a•dokko tang•dobatatna gita, IIM Shillong-ni gisik seng•gipa chatro chatrirangko an•tangtangni changa sapaniko jakkalenba ia indakgipa neng•nikani ba ra•bianirangko mikkangchakgrike warachakna changgipa ong•na gita okamaniko dakangaha.

Na·simang ia video-koba nina man·gen:

Na·simang iakoba poraina man·gen: A•doko gipin biaponi napbagiparangko champengsona aro drugs jakkalaniko bon•atna HYC kam ka•gen

India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.

Chingko ka·mao mesokgipa social mediarango jarikna man·gen:-

Twitter- twitter.com/nemediahub

Youtube channel- www.youtube.co

m/@NortheastMediaHub2020

Instagram- https://www.instagram.com/ne_media_hub