Shillong, July 13: Meghalaya sorkarini ning•o kam ka•na  mande rimnapani kamrangko a•bachengattaina man•taignok maina kachari niamo raiko on•manaha ine a•dokni Skotong Minister Conrad Sangma budbar salo parakataha.

Shillong-ni Police Headquarter-o talataniko dakanio, department ge•antion kamna rimnapani niamrang dingtanggrika, uni gimin sakantini sing•anirangna aganchakanirangba ge•sasan ba mingsan ong•jawa, dingtangrikani dongaigen. Je department-rangan chu•gimik niamo see on•anirang ba mesokanirang matchotahachim uarangde kamrangko a•bachengatna man•aignok ineba Sangma janapataha.

A•dokni mitam department-rangde namen dal•a ba apalgipa ong•ani a•selo uarangni niamo see rakkianirangko sandipile nipiltaianirango bang•bea somoirangko nangengkua . Indake ong•engon a•dok sorkarini gimik department-rangkon man•a dipet ta•rake niamo see on•anirangko sandie on•china Skotong Minister agandapaha.