Tura, Nov 18: A•chikrangni daka rikani aro janggi tangani bewalko ra•dona miksonge salgittamna ong•atenggipa Me•gong Festival-ko Bristibar salo, Meghalaya a•dokni Chief Minister Conrad K Sangma, do•ga oe on•angaha.
Ia Me•gong Festival-o dingtang dingtang jatrangni chu tariani bewalrangko nikna gita man•enga aro ia festival ba manianio Meghalaya a•dokonisan ong•aigija Arunachal Pradesh, Sikkim aro Assam a•dokrangoniba re•bae, mi aro biterangoniko tarigipa ringanirangko mesokangenga.
Ia manianiko do•ga oe on•angani somoio a•dokni Chief Minister jinmana aganprakangengon, ia manianiara Meghalaya a•dokni bilsi 50 gapani aro India a•songni jakgitelko man•aoni bilsi 75 gapaniko maniani bak gita ong•enga ine parakangaha.
Ia Me•gong Festival-ko ong•atanichi Tourism department, Garo Hills-ni nitoaniko aro rotogipa ong•aniko mesokenga ineba ua parakangaha.
Chief Minister-ni parakatani gitade, COVID sajinmani a•sel Tourism-ni kamrang bon•chongdikatako man•ahachim indiba da•o COVID sajinma namkalangahani gimin a•dok sorkari, dingtang dingtang program-rangko ong•ate tourism-ko tang•doatpilna aro gipin biaprangoni manderangko a•dokona salbapiltaina manchiaha.
Ia manianiko do•ga oe on•angani somoio a•dokni Chief Minister, ‘Meghalaya at 50’-na tarigimin ‘logo’-koba oprake on•angjolaha aro ia tom•anio North Tura-ni MLA Thomas A Sangma, Williamnagar-ni MLA Marcuise Marak aro gipin dilgiparangba dongpae bak ra•angaha.
Meghalaya a•dokni bilsi 50 gapaniko maniani bak gita dingtang dingtang manianirangko aro program-rangko ong•atangkugen aro ia manianiko mikkang 2022 bilsini January 21 tariko dal•bee tom•bimonganiko ong•atenba matchotatgen ineba ia tom•anio Chief Minister, jinmana parakataha.
Babadam-ni Chidekgre-o rikenggipa ‘Tribal Research Institute’-ni giminba ia tom•anio Chief Minister, jinmana aganangaha aro ia institute-ara dingtang dingtang jatrangni gimin am•sandina aro see rakkina cholko on•gen ine parakangaha.
Mikkang bilsio PA Sangma sagini atchiani salko maniani bak gita ia Tribal Research Institute-ko nokdonggae on•anggnok ineba ia tom•anio Chief Minister parakataha.
Me•gong Festival-ko da•ode bilsiantian manianggnok aro ia manianiko mikkang bilsi dipetde TRI campus-o manignok ineba Sangma parakataha.
Mikkang bilsi dipetde ia Me•gong Festival-ko dal•bate manina aro bang•bata program-rangko ong•atna sorkari manchisoenga ineba Chief Minister parakataha.
Ia chang Me•gong Festival-ko ong•atanio chu tarisusaanirang baksana dingtang dingtang jatrangni chrokani, git ring•ani aro uandakgipa dingtang dingtang program-rangkoba ong•atenga.
