Shillong, Oct 10: Sombar salo Meghalaya Progressive Workers Union (MePWU)-ni tom·aniko ong·atangenba, uamangni dabianirangko sorkarini knachakjaengani gimin re·baenggipa October-ni 17 tariko Lumjingshai-oni Main Secretariat-ona jinma tom·e re·jomaniko ong·atna tik ka·e donangaha.
Union-ni parakatani gitade, contractual-o kam ka·enggipa manderangni kamko regularize ka·china aro uamangni man·na nangkuenggipa arrear-rangko on·china dabienba, Sombar saloba uamang 1:30 bajioni 2:00 bajiona MePDCL office mikkango asonge jingjengatangaha.
Uamangni dabianirangko knachakjagenchimode October 14 tarikona kingking 1:30 bajioni 2:00 bajiona lunch break dharna-ko dakangkugen ine janapatengon, re·baenggipa October 17 tarikode MePWU-ni member-rang, MeECL Lumjingshai-oni Main Secretariat-ona jinma tom·e re·jomanggen ine union-ni dilgiparang parakataha.
