Shillong, July 12: Additional Director General of Police (ADGP) Idashisha Nongrang-ko Meghalaya a·doko skanggipa me·chik DGP songchina Hynniewtrep Youth Council (HYC), a·dok sorkario dabiangaha.
Meghalaya a·dokni DGP ong·enggipa IPS officer (1986 batch) R Chandranathan-na dongimin somoi ia bilsini November jaon bon·engahani gimin aro ua ia bilsini December 12 tarikon kamoni neng·takna siengahani gimin a·dokni ADGP ong·enggipa me·chik officer Idashisha Nongrang-ko uni biapo DGP songrikskachina HYC dabiangaha.
“Idashisha Nongrang-ko a·dokni skanggipa me·chik DGP songgenchimode ian a·doko songdongenggipa Tribal jatrangnasan ong·aigija a·dok gimiknan gisik ra·beani somoi ong·genchim,” ine Sombar salo HYC-ni general secretary Roy Kupar Synrem, a·dokni Chief Minister Conrad K Sangma-na sedoatgipa chittio parakataha.
Batanggimin somoirango gita a·doko kam ka·enggipa ja·delgimin police officer-rangni pal gipin a·dokrango dangdike on·enggipa police officer-rangko a·dokni DGP songtaigenchimode HYC raken jegalanirangko dakanggen ineba HYC-ni general secretary mikrakataniko on·angaha.
Meghalaya Police-ni official website-o Assam-Meghalaya Cadre-ni IPS Officer see rakkiani gitade, da·o dipet a·doko ADGP (L&O/TAP)-ko jako ra·e ka·enggipa Idashisha Nongrang-an dal·batgipa officer ong·enga ineba HYC parakataha.
“Uni gimin DGP-ni kamko jako ra·na gita Nongrang-an krabatsranggipa police officer ong·enga. Uni service record aro kamrangba uni police department-ko dilna kragipa ong·aniko mesokenga,” ine HYC-ni general secretary parakataha.
Iani bidingo kamko niatchina gita HYC, a·dokni Deputy Chief Minister Prestone Tynsong aro Home Minister Lahkmen Rymbui-koba didiataha.
