Shillong, Mar 9: Tangka gong 5000 cr batpile Gender Budget dake chamgipaoni 18%kode me·chikrangna an·seng-baljokaniko on·na jakkalgen ine Health Minister Ampareen Lyngdoh re·anggipa Sukrobar salo aganaha.
State Hub for Empowerment of Women aro State Rural Livelihoods Society baksa nangrime Social Welfare Departmentni International Women’s Dayko manidilao dongpae, Ampareen Lyngdoh, me·chikrangna dingtangmancha kam ka·ani bidingo aganaha.
“Noko donggipa me·chikrang, me·trarang, an·ching ku·cholsan ia salko manina nanga, maina a·gilsak gimikni iana ku·one maniengon India sorkariba bakrimaniko mesokpaenga,” ua aganaha.
Janggi tangani cholko dakna dingtang dingtang cholrangko bikotanio me·chikrangko bak ra·na on·na nangani gimin aganengon, ma·giparangna janggi tangani cholko dake on·engon nokdang bilakgen, aro nokdangrang bilakon songsal bilakgen ine ua aganaha.
Manianio Handicraft and Handloomni Chairperson Santa Mary Shylla, Social Welfare Departmentni Commissioner & Secretary Pravin Bakshi aro gipin dal·dalgipa officerrangba dongpaaha.
Ia salko manianio ma·manti a·barangko chu·sokgiparang, jekai song¬·a-chananio niksenggipa Nambi Jessica Marak, sportso niksenggipa Kmoin Wahlang aro Bonifilia Shullai, gital dake nianirango chu·sokgipa Sidalin Marbaniang aro Self-Help Groupo chu·sokgipa Pdiangsngewbha Pohti de·doako man·na kragiparang ong·e boksisrangko man·aha.
Me·chikrangni changa-sapanio dakchakaniko on·na sorkarini miksongani bak ong·e, ba·ra sikani machinerangkoba Welfare Departmentni ning·o donggipa Training for Women in Need of Care & Protection-ni Suprintendentna pakwate on·aha.
