Shillong, March 16: Meghalaya Health Systems Strengthening Project (MHSSP)ko a·doko a·bachengate on·na gita re·baenggipa bilsi-bongarangni gisepon gong kror 352 mang tangka-paisarangko a·dok sorkari jakkalgen ine a·dokni Health & Family Welfare-ni Minister Pa Alexander Laloo Hek, Mongolbar salo aganaha.
“A·doko pilak sana-banani a·barangko namdapatanina on·gilaniko dakna gita, re·baenggipa bilsi bongarangni gisepon gong kror 352 (World Bank-niko 70% aro a·dok sorkariniko 20%) mangni gita tangka-paisarangko jakkalangna miksonge Meghalaya sorkari, World Bank baksa nangrime MHSSP-ko a·bachengataha,” ine Pa Hek, Mongolbar salo Assembly-o u·iatangaha.
Ia mamlani bidingo Mawsynram-ni MLA Pa Himalaya Shangpliang-ni call attention notice-ko ra·bagipana ua ia kattarangko aganchakengachim.
“A·dokni sanchakram biaprang jekai district hospitals (DHs), community health centres (CHCs), primary health centres (PHCs) aro sub-centres (SCs)-rangko namdapatna gita skanggipa gadango a·dok sorkari gong kror 75 mang tangka-paisako jakkalenga,” ineba ua aganaha.
MHSSP-ko chief secretary-ni dilanichi project steering committee (PSC)ni nirokatani ning·o chalaigen aro iako Health & Family Welfare-ni department-o Joint Secretary aro PMU-ni Project Director-ni dilanio project management unit (PMU) aro HEN-chi a·bachengate on·anggen ine minister parakatkuaha.
