Shillong, June 29: West Jaintia Hills-ni District Prison-o kam ka·giparangna Mihmyntdu Community Social Welfare Association, HIV/AIDS sabisini bidingo mikrakata aro ui·ataniko skie on·angaha. Program-o District Prison-ni Superintendent Pa U Kyndiah, DSP Pa Batskem Nongbri-ba dongpaaha.
MCSWA-ni Director Dr J N Chullai HIV/AIDS jo·ongni batroroatani aro ua mandeni be·en ning·o donge parak ong·atningjani gimin talatan baksa sabisiko man·gipa manderangko galchipna nanggijani gimin agantalate on·angaha.
Jaintia Network For Positive People (JNPP)-ni President Ma R Suchiang aro dolni Secretary Pa Malsom, ma·siani a·palo HIV jo·ong-ko man·giparangna ui·atani aro sabisiko man·giparangna dakchakaniko on·a nangani bidingo aganangaha.
Ma Sunita Suna, HIV Act 2017 niam-ni bidingo talatangaha.
Ma Yooika Bareh program-ona rimchaksoani kattarangko aganaha aro bon·kame Ma Thywill Dkhar mitelpilskaani kattarangko agane program-ko matchotataha.
