Shillong, Dec 14: World Bank-ni dakchake on•gipa gong kror 554-ni ming 12 project-rangko 2022 bilsini December jao matchotgnok ine Mongolbar salo, Meghalaya a•dokni Deputy Chief Minister aro PWD (Roads) Minister Prestone Tynsong parakataha.
Tynsong-ni parakatani gitade, ia ming 12 project-rangoni ming 10-de rama tariani project-rang ong•a, jeonin mingbongade Garo Hills-o aro ming bongade Khasi Hills a•jao ong•enga. Gipin minggni project-rangara dolong tariani project ong•skaenga ineba Tynsong parakataha.
Ia ming 12 project-na 2020 bilsio World Bank, Meghalaya Integrated Transport Project (MITP)-ni ning•o gong kror 554.67-ko chame on•ahachim.
Ia project-rangko nipilna gita tom•aniko ong•atani ja•mano kobor ra•timgipa manderang baksa agangrikengon, pilak kamrangan nanga gita matchotengaha aro uamang ia kamrangko re•baenggipa 2022 bilsini December jani gisepode matchotna ka•dongenga ine a•dokni Deputy Chief Minister parakataha.
Mikkang antio ua department-ni official-rang baksa tom•e chanchirimangtaigen ineba Tynsong parakataha.
