Shillong, May 3: Meghalaya a•doko niamo pangchake koelarangko bikotna gita ma•mong sorkarioniko mining lease ba koela bikotani licence-rangko man•gipa manderang, Meghalaya a•dokni Chief Minister Conrad K Sangma-ko mittelpilna gita dingtangmancha tom•bimonganiko Nongstoin-o ong•atangaha.
Ia program matchotani ja•man kobor ra•timgipa manderang baksa agangrikengon, a•doko koela bikotaniko champengatani da•o bilsi 10-mang ong•angpilengahani gimin niamo pangchake koela bikotaniko a•bachengataniara a•dokna aro koela bikotanio pangchake janggi tangenggipa manderangna gisik ra•beani somoi ong•enga ine Chief Minister parakataha.
A•doko koela bikotaniko champengatanichi manderangsan ong•aija indiba sorkariba bang•bea kajinarangko gimaatna nange neng•nikanirangko chagrongna nangaha ineba ua aganaha.
Indake ong•genchimoba, da•o India sorkarini Coal Ministry, koela bikotani licence-rangko on•engahani gimin obostarang dingtangna siengaha ineba Sangma parakataha.
Niamo pangchake Meghalaya a•doko koela bikottaina gita dakchakanirangko on•ahani gimin ua, a•songni Prime Minister Narendra Modi aro Union Coal Minister Prahlad Joshi-koba mittelpilangaha.
