Aizawl, Dec 11: Sonibar salo, Myanmar a·songoni gue salbaenggipa truck gari boldokko, Mizoram a·dokni Mamit a·jao so·chipe galaha.

Koborrangko on·ani gitade, ia guerangko niam gri badingna gita salbaengachim aro ia gue salbaenggipa truck garirangko jolo gue ge·e cha·enggipa manderang so·chipe galaha.

Ia a·selni bidingo kobor ra·timgiparangna talate on·angengon, gipin a·songrangoni guerangko Mizoram a·doko niam gri badingna gita ra·baengani a·sel joltango gue ge·e cha·enggipa manderang neng·nikanirangko man·na nangtokengani gimin gue salbaenggipa truck garirangko so·e galaniara namgnisa ong·aia ine Mizoram a·dokni MP K Vanlalvena parakataha.

Truck garirangko so·e galanio darang manderangni sianirangkode kobor man·sojaha aro ia a·selni bidingo police-rang, mande saksniko rim·aha.

Tripura a·doko gue ge·e cha·enggipa manderangba apsan daken, guerangko Assam a·dokona watanio neng·nikanirangko chagrongna nangtokengachim.

Tripura a·doko gue ge·e cha·enggipa manderang, Assam-ona guerangko watanio neng·nikanirangko man·tokna nangengani gimin iandakgipa neng·nikanirangko namatna dakchakgen ine re·anggipa December 3 tarikosan, Assam-ni Chief Minister Himanta Biswa Sarma, Tripura-ni Chief Minister Dr Manik Saha-na ku·rachakaniko on·atahachim.