Shillong, April 18: A·doko da·o mongsongbate jera-ra·grikenggipa roster system aro minggipin neng·nikanirangni bidingo agangrikaniko dakna gita a·dokni skotong minister Pa Conrad K Sangma-ko an·tangni gitaba gronggen ine a·dokni Cabinet Minister aro Pynthorumkhrah-ni MLA Pa Alexander Laloo Hek, Mongolbar salo u·iatangaha.
Iani bidingo kobor ra·timgiparangna aganangengon, roster system-ko batanggimin somoiniko changija mikkangchini giminsa nigrike a·doko ra·gatna gita nangenga ine Pa Hek, an·tangni chanchiakoba parakangaha.
A·doko da·o ja·rikenggipa job reservation policy-ko taridapani ba nipiltaiani donggenchimode, iani gimin sakantikon okamchengesa nambate agan-chanchirimaniko dakna gita nanggen ine janapangenba, ia mamlani bidingo nigrike kamrangko ka·na gita MLA, Pa HM Shangpliang-ko convener donenba, MLA Pa Sanbor Shullai, dolni padot Pa Ernest Mawrie, BJP-ni agantimgipa Pa M. Kharkrang, party-ni legal adviser-rang— Vivan G Kynta aro SP Mahanta baksana Garo Hills-oni sakgni dilgiparang Pa Edmund K Sangma aro Ferlin CA Sangma-maangkoba commmitte-ni memborna seokange BJP dolni gitade uamang ge·sa committee-ko songaha ineba Pa Hek agandapataha.
