Shillong, April 18: Meghalaya a•dokni gitcham home minister aro Sohiong constituency-ni gitcham MLA HDR Lyngdoh sagini kamrangko aro uni mikkimko ra•doangkugen ine Mongolbar salo, Sohiong Assembly election-o United Democratic Party (UDP)-ni candidate ong•e susaenggipa Synshar Kupar Roy Lyngdoh Thabah parakataha.

Sohiong Assembly election-na an•tangni susaani lekkarangko on•eani ja•man kobor ra•timgipa manderang baksa agangrikengon, Sohiong-ni manderang ‘MLA’-namangmangde salanti Isolo bi•enga ong•ja indiba an•tangtangni dukrangni gimin Assembly-o ku•rang on•nagipa dilgipansa bi•enga ine Synshar parakataha.

Sohiong constituency-ni manderang, an•tangtangni namgnina skia pora donggipa dilgipakosa nangenga ineba ua aganaha.