Shillong, Feb 27: Meghalaya Legislative Assembly-na Sombar salo a·dok gimikchi pu·onatanio, attam 3 bajiona kingking 63.91 percent gape pu·onangtokaniko nikna gita man·aha.
Kosako janapgimin somoiona a·doko songdonggiparangni pu·onangtokaniko serikani gita, Eastern West Khasi Hills a·jao 81.71 percent-ni gita manderang ong·katgrimenba bang·bate pu·onangtokaha. Uni ja·mano, West Jaintia Hills a·jao 73.00 percent-mangni gita pu·onaha, Ri Bhoi a·jao 72.17 percent aro East Jaintia Hills a·jao 70.46 percent-ni gitade pu·ontokaniko nikna man·angaha.
Apsandake, A·chik a·songni dingtang dingtang a·jarangoba pilak songdonggiparang an·tangtangna bil on·giminko jakkale Sombar salo namnika tangtang candidate-ko basee pu·onangtokaha, jeon North Garo Hills a·jaoniko attam 3 bajiona 68.68 percent ong·aniko nikna man·aha, South West Khasi Hills a·jao 78.68%, uandake, South West Garo Hills-o 64.96%, East Khasi Hills-o 57.81%, South Garo Hills-o 60.39% aro West Khasi Hills-o 62.365% gape pu·onaniko nikna gita man·aha.
Ianpakni eleksino, Indian National Congress, Bharatiya Janata Party aro National People’s Party, iamang dolgittamni Meghalaya a·doko mongsongbatgiparang ong·e susagrikenga, jeni result-rangko re·baenggipa March 2 tariko parakatgniko knana gitaba Meghalaya-ni manderang ka·oksien nisengsotokenganikoba nikna man·enga.
