Tura, Jan 26: Sukrobar salo, India a·songni chang 75-gipa Republic Day-ko Tura-ni Matchakolgre LP School kal·chakramoba maniangaha aro ia salko manianio Meghalaya a·dokni Chief Minister Conrad K Sangma, a·dokni manderangna namgipa skaniko on·angenba, a·doko ta·rakbate namroro silroroaniko ra·bana gita sorkarini niksamsoanirangko jinmana parake on·angaha.

India a·songni jakgitelaniko man·anina a·songni ‘Father of the Nation’ Mahatma Gandhi aro gipin dilgiparangko mittelpilangengon, Mahatma Gandhi, Jawaharlal Nehru, Dr BR Ambedkar, Sardar Vallabhbhai Patel aro Netaji Subhash Chandra Bose gita dakgipa dilgiparangna mande ra·pilskaaniko on·na gita a·songni niam bidiko on·gimin niamrangko chu·sokatna gital dake on·kangtaienga ine Chief Minister parakataha.

Meghalaya a·dokni matgrikrang, jekai U Tirot Sing, U Kiang Nangbah, Pa Togan Nengminja Sangma aro uandakgipa gipin dilgiparangnaba ia salo ua dingtangmancha mande ra·pilskaaniko on·angaha.

Batanggimin bilsio chu·sokna man·gipa kamrangni gimin janapatengon, ru·utbea bilsirangna Assam aro Meghalaya a·dokni simarango ong·enggipa golmalrangko namatna gita sorkari, songgigrikaniko dakna man·aha aro a·doko bobil dake chakatenggipa HNLC bobil dolkoba tom·tomaniona rimbana gita sorkari kamko ka·enga ine Sangma parakataha.

Dingtang dingtang department-rango a·dokni ta·raken namroro silroroaniko nikna man·aha ine janapatengon, Police department-ni ning·o bakan sak 3000 manderangko kamo rimnapna siengaha ine Chief Minister aganaha.

Manderangni nanganirangko chu·sokatna gita sorkari rakbee kamrangko ka·enga ine janapatskaengon, rama jal·langrangko tariani, chirangko sokate on·ani, bijoliko nambate on·ani aro Information Technology-ko tang·doatanian sorkarini mongsonggipa nisanrang ong·enga ine Sangma aganaha.

Adita salrangna skang Tura-o a·dokni Governor Phagu Chauhan-ni Raj Bhavan-ko nokdonggae on·anganikoba mingsa dal·batsranggipa chu·sokani ong·aha ine Chief Minister aganaha.

Re·anggipa January-ni 21 tariko, chang 52-gipa Meghalaya Day-ko manianio, Meghalaya State Language Act 2005-o pangchake a·bachengatgipa State Anthem ba a·dokni ring·ani gimiba ia salo Sangma janapangaha.

Meghalaya a·dokni jillarangko namdapatani gimin janapangengon, a·doko donggipa dingtang dingtang jillarangko namdapatna gita sorkari, Street Vendors Scheme aro Act-ko parakataha aro dingtang dingtang biaprangko nitobatatanio manderangni bakrimaniko man·na gita ‘My City Campaign’-ko a·bachengataha ine Chief Minister parakataha.

Shillong songjinmaoni dingtang dingtang dal·dalgipa songjinmarangona sildorengrangko watna aro Baljek Airport-ko a·bachengatna gita sorkari rakbee kamrangko ka·enga ineba Sangma aganaha.

A·doko songdongenggipa manderangna janggi tangani cholrangko on·ani bidingo janapatengon, game ge·e cha·gipa manderangni bosturangko a·gilsakni gipin biaprangona watatani, processing unit-rangko kuliani aro uandakgipa kamrangchi Meghalaya a·dok, ‘One District One Product’ Awards-koba man·aha ine Chief Minister parakataha.

Indake ong·engon, a·doko Self Help Group-rangko tang·doate songo noko manderangna janggi tangani cholrangko on·ani, jilla kaani, na·tok jilani aro uandakgipa janggi tangani cholrangko on·ani giminba ia tom·anio Chief Minister aganangaha.

Una agreba, Tourism, IT, Health, Education, Sports aro uandakgipa dingtang dingtang department-ni ning·o a·dok sorkarini chu·sokatgimin aro mikkangchi chu·sokatna krengenggipa kamrangni giminba a·songni Republic Day-ko maniani salo a·dokni Chief Minister, jinmana talate on·angaha.

Iakoba poraie nina man·gen: Education Minister Rakkam Sangma aro MP Agatha, gital ong•e rakkigimin skigiparangna nama skaniko on•a

WATCH:

Find latest news from every corner of Northeast India at hubnetwork.in, your online source for breaking news, video coverage.

Also, Follow us on-

Twitter-twitter.com/nemediahub

Youtube channel- www.youtube.com/@NortheastMediaHub2020

Instagram- www.instagram.com/nemediahub