Shillong, Oct 30: Sonibar salo Meghalaya a•dokni damgittam Assembly constituency-rango ong•atanggipa bye-election tom•tome matchotangaha aro ia bye-election-ko ong•atanio COVID-19-ni niamrang donggenchimoba ia damgittam constituency-rangon dilgiparangko seokanio bang•a manderangan bakko ra•angtokaha.
Meghalaya a•dokni sakgittam MLA-rang, chong•motan Mawryngkneng constituency-ni MLA David A Nongrum, Mawphlang constituency-ni MLA SK Sunn aro Rajabala constituency-ni MLA Dr Azad Zaman, ia bilsini gisepo siangahani gimin ia damgittam constituency-ni by-election-ko ong•atna nangahachim.
Indake ong•engon, ia damgittam Assembly constituency-rangoni Rajabala Assembly constituency-o pu•onani 90.63% ong•e bang•bate pu•onani ong•aha.
Koborko man•soani gitade, attam 5:00 bajiona kingking ia damgittam constituency-rango pu•onani 13 Mawryngkneng Assembly constituency-o 74.69%, Mawphlang constituency-o 75.97% aro Rajabala constituency-o 90.63% ong•e ia damgittam Assembly constituency-o pu•onani 80.43 percent gapaha.
Ia damgittam Assembly constituency-rango bye-election-ko ong•atengon, maming so•sojengjeng ong•anirangkoba knasona man•jaha.
Rajabala bye-election-ni Returning Officer CN Sangma-ni u•iatani gitade, ia constituency-ni ning•o donggipa Batabari aro Old Bhaitbari polling station-rango VVPAT machine ge•gni nosto ong•ahachim indiba pu•onaniko a•bachengna skangan ia machine-rangni pal gipin machine-rangko donatskaaha.
Ia damgittam constituency-ni ning•o kenchakna nangbatgipa aro simsakna nangbatgipa gimik dam 47 polling station-rang dongachim aro ia polling station-rango ma•mongni sipai dolrang baksana a•dokni sipai dolrangkoba donataha.
Ia dam 47 polling station-rangoni dam 29-de Rajabala-o, dam 8-de Mawryngkneng-o aro dam 10-de Mawphlang constituency-o ong•achim.
Rajabala constituency-o komibatsrange pu•ongipa polling station-ara Masangpani polling station ong•aha aro bang•bate pu•ongipa polling station-ara Garobudi polling station ong•skaaha. Masangpani polling station-o pu•onani 78.11 percent ong•aha aro Garodubi-o 97.4 percent gapskaaha.
“Rajabala constituency-ni bang•a polling dolrangan da•o dipet sokbatokkujaengani gimin ia constituency-o pu•onani 91 percent batangnaba gnang,” ine West Garo Hills a•jani District Election Officer Ram Singh parakataha.
Rajabala by-election-o gimik sak 5 candidate-rang susaengachim aro uamangara, Congress dolni Hashina Yasmin Mondal, NPP-ni Abdus Saleh, UDP-ni Ashahel D Shira, BJP-ni Kingstone B Marak aro Independent candidate Carla R Marak ong•engachim.
