Tura, April 27: Meghalaya a·dokni Chief Minister Conrad K Sangma aro Meghalaya Legislative Assembly-ni Speaker Thomas A Sangma-na Bristibar salo, National People’s Party (NPP) West Garo Hills unit-ni gita mande ra·pilskaani program-ko ong·atangaha.
Ia program-ko ong·atanio a·dokni Chief Minister, jinmana aganprakangengon, gnigipa changna uko seokahani gimin Tura-ni manderangko mittelpilangenba, NPP-chi dilenggipa sorkari, a·doko pilakni gitan namroro silroroaniko ra·bana kang·kare kae kam ka·enga ine parakataha.
Ia 2023 bilsini Assembly election-o a·dokni manderang NPP-ko seokahani gimin ian namen dingtangmanchagipa election ong·aha ineba ua aganaha.
Chief Minister-ni parakatani gitade, Garo Hills-o dam 24 seat-rangoni dam 18 seat-rangko NPP-ni cheaniara NPP-mangmangsan a·dokna namroro silroroaniko ra·bana man·gipa dol ong·a ine manderangni bebera·aniko mesokani ong·aha.
Ia tom·anio Assembly-ni Speaker Thomas A Sangma-ba jinmana aganprakangengon, ia bilsini election-oba uko seoktaiahani gimin North Tura constituency-ni manderangko mittelpilangenba, Speaker ong·e Assembly-ko dilna gita una cholko on·ahani gimin ua Chief Minister Conrad K Sangma-koba mittelpilangaha.
PA Sangma sagini ning·o uni kam ka·gipa salrangko gisik ra·atpilengon, Assembly-ni Speaker ong·e ua pangnan Assembly-ni mikkimko ra·doangkuna kam ka·angkugen ine Sangma parakataha.
Ia program-ko ong·atanio dingtang dingtang dakmesokanirangkoba nikangna gita man·aha.
