Shillong, Jan 21: New Shillong Township (NST)-ni Umsawli-o gital Secretariat-ko rikna gita Mongolbar salo, Meghalaya a•dokni Chief Minister Conrad K Sangma, pangchakaniko songe on•angaha aro ia pangchakaniko songanio, a•dokni Deputy Chief Minister Prestone Tynsong, sakgipin Deputy CM Sniawbhalang Dhar, Power Minister Abu Taher Mondal, Health Minister Ampareen Lyngdoh, PHE Minister Marcuise Marak aro Food Civil Supplies & Consumer Affairs Minister Comingone Ymbon-ba dongpaaha.

Ia gital Secretariat-ko acre 53 ong•gipa a•ao rikna sienga aro iana gong crore 1188 korosko hisapenga.

Ia gital Secretariat aro Directorate campus-ko bakgni dake New Shillong administrative township-o rikgen aro iano dam 68 office-rang, auditorium aro sak 1829 kam ka•giparangna biaprang donggen.

Gnigipa complex-o lak 1.25 sq metre biap donggen aro iano dam 56 office-rang, sak 4746 kam ka•giparangna biaprang aro dam 2 auditorium dongskagen.

Ia gital Secretariat-na pangchakaniko songe on•anganio a•dokni Chief Minister, jinmana aganprakangengon, ia gital Secretariat-ko rikaniara nokko rikmangmanganisan ong•jaenga indiba Shillong songjinmako apalbatatanisa ong•enga ine aganaha.

Ia gital secretariat-ni design-ni bidingo janapangengon, ian AI-oniko tarigipa video ong•ja indiba ian ia biapo ong•katna sienggipa asol building-ni asol design-sa ong•enga aro iako tarianio bilsisana baten nangaha ine Chief Minister parakataha.

New Shillong-o nabaenggipa Administrative City aro Knowledge City-ko dal•roroani bijangchi ine janapatengon, ia biapo gital Secretariat aro ramarangko tarianichi a•dokna aro a•doko songdongenggipa manderangna sorkari pangchakaniko songe on•enga ine Chief Minister parakataha.

Ia New Shillong-na gong crore 5500-ko invest ka•na gita sorkari tik ka•manaha aro unbaksana crore 10,000-mangni gita tangka paisarangko koros ka•dapna miksonganirang dongkuenga ineba ua aganaha.

Chadamberangna, game ge•e cha•giparangna aro me•chikrangna dingtang dingtang scheme-rangko ra•gatanichi manderangni janggi tangani gadangkoba namdapatna man•enga ineba Chief Minister aganaha.

Ia tom•anio a•dokni Deputy CM Sniawbhalang Dhar-ba aganprakengon, a•dokko mikkangchi mangrakbatatna gitasa ia gital nokko sorkari rikenga ine aganaha.

Ia gital Secretariat-na pangchakaniko songanio a•dokni sakgipin Deputy CM Prestone Tynsong-ba jinmana aganprakengon, sorkarini kamrangko ia New Shillong-oni nambate ka•na man•na gita ia gital Secretariat-ko a•dokni Chief Minister Conrad K Sangma-sa chanchichengaha ine parakataha.

Ia tom•anio a•dokni Chief Minister, CM Elevate, FOCUS, Green Meghalaya + aro Tourism project-rangni gong crore 63 tangkarangko gimik sak 6000 manderangna sualatjolaha.

Na·simang ia video-koba nina man·gen:

Na·simang iakoba poraina man·gen: NGH-o chang 53-gipa M’laya Day-ko mania

India A·songni Salgro Salaram A·dokni gitalgipa koborrangko ma·sina sikode na·simang hubnetwork.in, oniko video-ko niangan baksa poraina man·gen.

Chingko ka·mao mesokgipa social mediarango jarikna man·gen:-

Twitter- twitter.com/nemediahub

Youtube channel- www.youtube.com/@NortheastMediaHub2020

Instagram- https://www.instagram.com/ne_media_hub