Shillong, Mar 3: Ukraine a•songo poraienggipa Meghalaya a•dokni chatro chatrirangko rimongkatbana gita External Affairs Ministry-ni Minister of State V Muraleedharan aro Law Minister Kiren Rijiju baksa agangrikataha aro Ukraine a•songo jachange dongna nangenggipa chatro chatrirangni bimingrangko on•ataha ine Bristibar salo, Pynthorumkhrah-ni MLA aro Chief Minister-ni Advisor AL Hek, Hub News-na parakataha.

Hek-ni parakatani gitade, Ukraine a•songo poraienggipa mitam chatro chatrirangni ma•a paarang uko gronge, an•tangtangni dedrangko Ukraine a•songoniko tom•tome rimongkatbachina mol•molahani gimin ua February 28 tarikon Muraleedharan aro Rijiju baksa agangrikataha.

Ia kamko ua politics-ni gita miksonge ka•jaenga ine mandeskako dakchakgrikani gitasa ka•enga ineba Hek aganaha.

Hek-ni aganani gitade, Meghalaya a•dokni chatro chatrirangko maming a•sel grian New Delhi-ona sokate on•na a•songni dilgiparangba ku•rachakaniko on•ataha.