Shillong, Mar 16: Meghalaya a•dokni dam 11 a•jarango me•chik police station-rangko sorkari songe on•manaha.

Budbar salo, Mawlai-ni MLA PT Sawkmie-ni Assembly-o sing•anina a•dokni Home Minister Lahkmen Rymbui, ia kattarangko parakataha. Ia me•chik police station-rangko 2018 bilsion songe on•aha ineba ua parakataha.

Meghalaya a•dokni dam 12-gipa Eastern West Khasi Hills a•janade da•o adita somoirangni gisepo proposal-ko on•gen ineba Rymbui aganaha.

Gisikni gita aro ainni gita dakchakanirangko sandienggipa manderangna home aro social department-rang nangrime dakchakanirangko on•engama ine Umroi-ni MLA George B Lyngdoh-ni sing•anina aganchakaniko on•angengon, dakchakanirangko nangenggipa manderangna nangani kri sorkari dakchakanirangko on•enga ine minister parakataha.