New Delhi, Feb 20: 2024-25 bilsini gisepon India a·songko trillion 5 dollar-chi man·e cha·batatna gita a·songni Prime Minister Narendra Modi, nisanko donsoengani gimin da·o bilsi 5-ni gisepon Meghalaya a·dokni GSDP-ko billion 10 dollar-ona bariatna tarimanaha ine da·al Sonibar salo, internet gita Prime Minister Narendra Modi-ni dilanggipa NITI Aayog commission-ni ning·o donggipa governing council-ni changdokgipa tom·bimonganio Meghalaya a·dokni Chief Minister Conrad K Sangma parakataha.
NITI Aayog-ni niksamsoe kam ka·anirangchi ma·mong sorkarini ‘Aatma Nirbhar Bharat’-ko chu·sokgipa ong·atna dakchakgen ineba Sangma parakataha.
Meghalaya a·dokni GSDP-ko changgni baridapatani bidingo talataniko on·angengon, a·doko pangkamgipa namroro silroroaniko ra·bana man·na gita a·dok sorkari dingtang dingtang cholrangko sandimanaha ine Chief Minister parakataha.
“Da·o mikkang bilsi 10-ni gisepon chinga Per Capita Income aro pangkamgipa namroro silroroani cholrangko chu·sokate a·songo nambatsranggipa dam 10 a·dokrangoni damsa ong·pana nangnikenga,” ine Chief Minister aganaha.
Meghalaya a·doko songdongenggipa manderangoni 80 percent-an songadam nokadamrango aro game ge·e cha·anio pangchake janggi tanggiparangsa ong·a ine janapatengon, a·doko lak 4.5-mangni gita nokdangrangde game ge·e cha·giparangsa ong·a aro Meghalaya sorkari, a·doko game ge·e cha·ani kamrangko nambatatna chanchisamsoaha ine Chief Minister parakataha.
PMGSY-ni ning·o songadam nokadamrangni km 1,950 ramarangko tarina gong kror 2,500-mangni gita tangkarangko koros ka·na man·ahani giminba ua a·songni Prime Minister-ko mittelpilangaha.
Meghalaya a·doko ra·gate ka·enggipa India sorkarini Jal Jeevan Mission-ko ua an·tangan niroke kamko ka·dilenga ine janapatengon, ia Jal Jeevan Mission-ni ning·o songadam nokadamrango donggipa nokdangrangna 2024 bilsini gisepo chirangko sale on·na ma·mong sorkari nisanko donenga indiba Meghalaya a·doko ge lak 5.9 nokdangrangna 2022 bilsion chirangko sale on·na nisanko donskaenga ine Chief Minister parakataha.
India sorkarini dakchake on·anichi Greater Baghmara Water Supply Scheme, Nongstoin Water Supply Scheme aro uandakgipa scheme-rangko Meghalaya sorkari jako ra·e a·bachengataha ineba Sangma parakataha.
“Lekka poraniko tang·doatna gitaba chinga a·dokni pilak primary aro secondary skulrangko tarina gong kror 100-ko chame donmanaha. Apsan daken degree college-rangkoba namdapatna gita chinga gong kror 36 tangkarangko chame on·aha,” ine Chief Minister aganaha.
World Bank-ni dakchakanichi Meghalaya a·doko sanna bananirangko on·chakgipa biaprangko namdapatna gita a·dok sorkari gong kror 350 tangkarangko jakkalenga ineba ua parakataha.
Tourism-ni bidingo janapatengon, ‘New Development Bank’-ni dakchake on·enggipa gong kror 730 tangkarangchi a·dok sorkari, Meghalaya-o tourism-ko pangkamgipa ong·atna kamko ka·enga ine Sangma parakataha.
