Shillong, Feb 20: Re·baenggipa March aro April jani gisepon Assam a·dokni Assembly election-ko ong·atna siengahani gimin da·al Sonibar salo, National People’s Party (NPP)-ni state adhoc committee-ko Assam-o songaha.
Assam a·doko NPP-ni state adhoc committee songaniko da·al salni bako Shillong songjinmao jinmana parakataha aro ia committee-ni office bearer-rangko NPP-ni national general secretary aro Assam a·dokni Finance baksana Election-ni kamrangko nirokenggipa James PK Sangma songe on·angaha.
Assam a·doko NPP-ni adhoc committee-ko dilna seokako man·gipa manderangara, vice president-na Biswajit Baruah, general secretary-na Abul Hussain, Purna Kanta Pegu aro Partha Pratim Mahanta, secretary-na Fulgence Toppo, Raj Prasad Saikai aro Chandan Kalita, secretary (BTR in-charge)-na Ringkhang Mushahary, treasurer-na Sunit Das, office secretary-na Nihar Ranjan Gogoi, convenor-na Krishna Bhattacharya (women’s wing) aro Lakhyana Lagasu (women’s wing) ong·a.
Ia committee-ni gital member-rangna an·tangni namgipa skaniko parakatengon, da·o ong·atna sienggipa Assam Assembly election-o NPP dolba susana gita tarisamsoengani gimin NPP dolko mangrakbatatna gita an·tangtangko on·kange kam ka·china Sangma didiataha.
Indake ong·engon, ia chang Assam Assembly election-o chee biapko man·rikpana gita NPP dol susaenga ine National People’s Youth Front (NPYF)-ni national working president Nicky Nongkhlaw parakataha.
Assam Assembly election-o NPP dol badita dam constituency-rango susagen da·o dipet dolni gita name tik ka·kujaenga aro da·osa candidate-rangko seokna kamko ka·enga ineba Nongkhlaw parakataha.
Assam a·dokni manderang dingtanganiko nangniktokengahani gimin ia chang Assam Assembly election-o NPP dol seat bang·kale chena ka·dongenga ineba NPYF-ni dilgipa parakataha.
Assam a·doko NPP-ni bipekko 2017 bilsion songahachim indiba kamrangko ka·a dongjahani gimin da·al salo NPP-ni adhoc committee-ko songe Assam-o NPP dolko tangchaatpiltaiaha ineba NPP-ni dilgiparang u·iataha.
