Shillong, May 8: Meghalaya a•doko donggipa Laitkor-oni Lorenza Songthiang minggipa me•tra saksa, April 30 tarikoni May 4 tarikona Uzbekistan a•songni Tashkent songjinmao ong•atanggipa World Pankration Championship-o bakko ra•e Bronze medal-ko chebaaha.
Ia world championship-o ua Senior Elite Group-o bakko ra•e Bronze medal-ko cheaha indiba Gold aro Silver medal-kode Ukraine a•songni Martial Art fighter-rang cheangskaaha.
Uni chu•sokgipa ong•baani ja•man Sombar salo uko a•dokni Chief Minister Conrad K Sangma grongaha aro uamangna tangka paisani gita dakchakanirangko on•na ku•rachakangaha.
Uzbekistan a•songo ong•atanggipa World Pankration Championship-o Bronze medal-ko cheahani gimin da•o Lorenza Songthiang, October jao Saudi Arabia-ni Riyadh-o ong•atna sienggipa World Combat Games-o susapana gita cholko man•engaha.
