Shillong, May 8: Jowai-ni saksa bilsi 22-ong·gipa Model, Tra Rupda Lato, ia bilsio Turkey a·songni Antalya-o ong·nasienggipa Miss Aura International Beauty Pageant-o India a·songni pal ong·e bakko ra·ena gita tariaha.
Jowai-ni Panaliar songoni Pa Riquoma Rq Laloo aro Ma Yoobina Lato-ni demechik Rupda Lato, iana skang susaange Miss India the State of Meghalaya-o skanggipa changna chegipa ong·e title-ko rakkienggipa ong·a.
Tra Lato, saksa fitness trainer aro ki·tap segipaba ong·an baksana actress aro fashion-na gisiko nanggipaba ong·a. Ia susaanio bakko ra·na gita ua, pilak dakna nangarangko matchotani ja·man aro baditaba changna interview-rango mikkangchakani ja·man, ia bilsini Septembar 17 tarikoni October 1 tarikona ong·atnasienggipa niksenggipa Miss Aura International beauty pageant-o bak ra·na seokaniko man·angaha.
Iandakgipa cholko man·anganina kusi ong·chakenba, gitcham Rubaru Miss India Elite, Nakita Tania Fernandes baksana Rubaru Mr. India-o chegiparang, Chena Ram Choudhary, Nehal Patil aro Shubham Kotharkar-maang gimik, Tra Lato-ko mande ra·pilskaanikoba dakangaha.
