Tura, Dec 16: Meghalaya a•doko skulrang, re•baenggipa December 21 tarikoni chutti man•gen aro skulrangko re•baenggipa January 11 tariko kulipilgen ine Meghalaya Education department-ni Principal Secretary DP Wahlang u•iataha.
Principal Secretary-ni u•iatani gitade, 2021 bilsini Board porikkarangko sena sienggiparangna agrede skulni pilak class-rangnan ‘Academic Calender’-ko taridapaha.
Skulrango final exam ba bon•kamgipa porikkarangko re•baenggipa bilsini March 11 tarikoni March 20 tarikona ong•atanggen aro skulrang March 21 tarikoni March 31 tarikonade ‘term break’-ko man•gen.
2021-22 bilsini gital academic session-ko April 1 tariko a•bachengatskana a•dok sorkari tik ka•e donangaha.
Wahlang-ni u•iatani gitade, Class 9-oni Class 12-ona poraienggipa chatro chatrirang, an•tangtangni course-rangko matchotna man•na gita aro mikkang bilsini Board porikkana tarisamsona man•na gita ia class-rangko January 11 tarikon chu•gimik kulianggen.
Class 6-oni class 8-onade songadam nokadamrangoba chu•gimik kulitokgen indiba Shillong, Jowai, Nongpoh, Tura, Byrnihat, Jorabat aro Khanapara-ode ia class-rangko chu•gimik kulikujawa ineba Education official parakataha.
Class 1-oni Class 5-onade songadam nokadamrango tong•sa kuligen indiba jillarangode ia class-rangko kuliskakujawa.
Indake ong•genchimoba, skulrangko kulipilna skang skulni managing committee-rang, skulo poraienggipa chatro chatrirangni ma•a paarang, district health official-rang aro jolni dilgiparang baksa agangrikchengna nanggen ine Wahlang u•iataha.
