25.9 C
Tura

MeECL-o kam ka·enggiparangni jingjengataniko dontongatpila

Must read

Shillong, Dec 16: Meghalaya Energy Corporation Limited (MeECL)-o kam ka·enggiparangna, uamangni man·na nangkuenggipa dormaharangko on·na ku·rachakahani gimin management-ni kosako jingjengataniko dontongatchengaha ine Coordination Committee of Registered MeECL (Employees) Associations & Unions (CCORMAU)-ni president PK Shullet parakataha.

Shullet-ni Hub News-na u·iatani gitade, MeECL-o kam ka·enggiparangna October jani dormahako Budbar attamo, November jani dormahako mikkang antio aro December ja baksana mikkangchi jaantini dormahako jaantian skanggipa antio on·na gita MeECL-ni chairman aro managing director Arun Kembhavi, ku·rachakahani gimin MeECL-o kam ka·enggiparangni jingjengataniko dontongatpilaha.

MeECL-o kam ka·enggiparangna jagnini dormaharangko on·kujaengani gimin aro kam ka·giparangna pangnan ja·manchakesa dormaharangko on·rongengani gimin MeECL-o kam ka·enggiparang, Budbar salo okumu chake jingjengatna a·bachengahachim ine nikna man·a.

MeECL-o kam ka·enggiparang dormaharangko man·jaengani gimin okumu chake jingjengata

Meghalaya Energy Corporation Limited (MeECL)-o kam ka·enggiparangna October aro November jani dormaharangko on·kujaengani gimin ia jagnini dormaharangko ta·raken on·china gita dabie Budbar salo, okumu chake jingjengatna a·bachengaha.

Iani bidingo Hub News baksa agangrikengon, MeECL-o kam ka·enggiparangna jagnini dormaharangko on·kujaengani gimin aro kam ka·giparangna pangnan ja·manchakesa dormaharangko on·rongengani gimin MeECL-o kam ka·enggiparang, okumu chake jingjengatna a·bachengaha ine Coordination Committee of Registered MeECL (employees) Associations & Unions (CCORMAU)-ni president PK Shulet parakataha.

“Batanggimin jarangoba MeECL-ko nirokenggiparang, kam ka·giparangna dormaharangko on·ningjaha aro da·oba chingna October aro November jani dormaharangko on·kujaenga,” ine Shulet parakataha.

Koborko on·ani gitade, MeECL-o kam ka·enggiparangna dormaharangko da·o Krismasna skangan on·gen ine adita salrangna skangsan, MeECL-ni Managing Director Arun Kembhavi parakatahachim.

“Media-ni mikkango agananide dingtang aro kam ka·giparangna mikkango ku·rachakaniara dingtang ong·a. Iani bidingo chingko okamate agangrikchina chinga management-ko didienga aro uamang chingna seachisa ku·rachakaniko on·na nanggen,” ine Managing Director-ni ku·rachakgipa kattarangna, CCORMAU-ni president parakatskaaha.

Shulet-ni parakatani gitade, MeECL-o kam ka·enggiparang aro kamoni neng·takgimin pensioner-rangoni gimik sak 4000-mangni gita okumu chake jingjengatanio bakko ra·angpaaha.

“MeECL management-ni kosako suk ong·gijaniko mesokna gita chinga committee-ni membor-rang signature campaign-koba dakaha. Chingni jingjengatengmiting somoio membor-rangoni saksakoba rim·genchimode chinga kam ka·giparang jinma pattokona re·anggen ine chingni tom·anio manchie donmanaha. Kamoni neng·takgimin pensioner-rangba membor-rangoni sakoba rim·genchimode jinma pattoko dongpana aganenga,” ine Shulet parakataha.

CCORMAU-ni parakatani gitade, November-ni 27 tariko kajinarangoniko man·gipa tangka paisarangchi October jani dormahako on·na manchiahachim indiba dikdiksani ja·manon MeECL-ko nirokenggiparang, dormahako on·gija grorangkosa chotskana manchiskaaha aro iani giminsa kam ka·giparang suk ong·jae jinma jingjengatna manchiskaaha.

“Chingni dormaharangko ta·raken on·gen ine management ku·rachakaniko on·na nanggen aro mikkangchiba jaantian skanggipa antion chingni dormaharangko on·na nanggen,” ine CCORMAU-ni president dabiangaha.

Bristibar saloba MeECL-o kam ka·enggiparang okumu chake jingjengatangkugen ineba u·iataha.

More articles

-->
-->

Latest article