Shillong, June 22: Bilsisana skang, NPP dolni Pa James K Sangma-ni a·dokni Home Minister ong·mitingo niam gri koela bikotanirangko jako ra·e nirokatani bidingo civil society ba songsalni namgnina kamko ka·gipa dolni badi ka·doangmiting somoio Pa James-ko bakbakan ra·galchina gita NPP baksa bakrime sorkariko rikenggipa a·joltangni political dol, United Democratic Party (UDP)-an ku·rangko on·chenggipa ong·achim.
Bilsisa batani ja·man cabinet-ko jujagrikatao, UDP-ni Pa Lakhmen Rymbui, Home Ministry-ko jako ra·skaaha, indiba apsandaken da·o niam gri koela bikote gipinchina salsrukanirang ong·kuaiengani koborrangko da·omangba man·engkua.
Ia ong·enggipa obostao mingsa dingtanggrikaniara, UDP dol ia somoirangode a·doko mamingba ong·jaenga ingipa gita chacha jrip-mittip ong·skaengachim.
Uamangni iandake jrip donganiko nike, a·dokni warachakgipa dolni dilgiparang aro civil society-ni memborrang adita salrangna skang mirong bag laksako Assam-ni godown-oniko rim·anio UDP-ni minister Pa Krymen Skylla-ni skotong ong·enggipa Social Welfare Department-ni kosako matangenggipani bidingo dolni jrip dongaenganina sing·doangtokaha.
“Manderangni janggi tanganio mongsong nangchakegipa ong·engon UDP maini gimin jrip-mittip ong·enga? Mirongko jako ra·ani aro uarangko jakkalani gimin UDP dol talate on·na nanga maina iani portfolio-ko ia dolsa jako ra·enga,” ine Congress-ni MP Pa Vincent Pala, adita salrangna skang UDP dolni a·gipi dilgipa Pa Jemino Mawthoh aro Pa Metbah Lyngdoh-maangni kosako sing·doangaha.
Power Department-ko jako ra·oba power minsiter Pa James Sangma-ko ra·galani gimin UDP dolsa changsatai ku·sik nachengaha, indiba doltangona ga·akode uamang jrip dongtoka ineba Pa Pala agandapangha.
A·dokni warachakgipa Congress dolni dilgipa Pa Mukul Sangma-ba daitoko ra·e kam ka·anirango chu·onggijani gimin UDP dolko matnange aganangaha.
Mirong bagrangko man·ani bidingo UDP-ni Social Welfare minister Pa Kyrmen Shylla an·tangde koborni manderangoni chel·tange dongaiaha aro mija June 17 tarikosa iani gimin koborna seachi janapatskaenba Integrated Child Development Services (ICDS)-ko niam gita ja·rike dakani gimin dingtang dingtang niamrango pangchakesa seachi janapataiaha.
Mirongrangko cha·bokani bidingo, private contractor-rang aro cha·ani tarigiparangna janggil gita cholko on·engani kakketko donnuna gita Social Welfare Department, niamko talate on·na jotton ka·angaha ine civil society-ni membor Ma Angela Rangad parakataha.
Iasan ong·aigija, Civil Society Women’s Organization (CSWO)-ni ma·dot Ma Agnes Kharshiing-ni koborna parakatani gita, Pa Kyrmen Shylla-ni minister ong·mitingo Women’s Commission-ko songgijanian a·dokni me·chikrangni namgnina Social Welfare Department -ni gisiko nanggijaniko mesokenga.
Iarangna agreba, UDP-ni minister-rang mongsonggipa portfolio-ko jako ra·ani bidingo jekai Education-ko jako ra·ani giminba matnanganirangko man·engon, dolni gitade iani gimin da·oba maming aganchakanirang dongkujachim.
Ma·mong sorkarini parakatanian mikkangchina mikrakna nangani ong·enga aro a·dokni skia-porani gadang skangna bate tang·dobatjok inesan Education minister, Pa Lakhmen Rymbui aganchakangaha.
“Dal·drobaenggiparangko nama ramao dilna gita seng·gipa-matgipa aro skia-pora donggipa mandeko an·ching nangenga. Skia-porani mongsonggipa biap an·chingon ong·a indiba uni mikkim namen tang·onangaha,” ineba Ma Kharshiing koborna aganangaha.
Indake ong·engon, rebaenggipa 2023 bilsio ong·gnigipa eleksinrang sepangrorobaengon, baditana kingking ia dol an·tangtangko naljokate rakkiangna amgen? ian da·o sing·ani ong·enga.
