Shillong, May 30: Meghalaya a•doko COVID-19-ni tikarang bon•angengahani gimin bilsi 18-oni bilsi 44 ong•gipa manderangna tika su•aniko dontongatchengna nangaha.
Koborko on•ani gitade, bang•a manderangan re•baenggipa antio tikarangko su•e ra•na nisenge dongtokengachim indiba tikarang bon•angengahani gimin Cowin website-o tika su•na register ka•aniko dontongatchengaha.
Bilsi 18-oni bilsi 44 ong•gipa manderangko May 24 tarikoni May 30 tarikona tika su•na gita online registration-ko May 23 tarikoni a•bachengahachim indiba da•o tikarang bon•changengahani gimin bilsi 18 batgipa manderangko tika su•na register ka•aniko dontongatchengaha.
Bilsi 18-oni bilsi 44-onade tikarangko su•na gita biming segatchengna nanggenchimoba bilsi 45 badegimin manderangde biming segatchenggija health centre-rangona re•ange tikarangko su•e ra•skana man•aiachim.
Meghalaya a•dokni Health Minister AL Hek-ni u•iatani gitade, a•doko chu•onga gita tikarang dongjahani gimin tika su•aniko dontongatchengna nangaha. Bilsi 18-oni bilsi 44 ong•gipa manderangko tika su•na gita Meghalaya a•dokoba pong 43,000 tikarangsan sokbakuengachim ineba Hek parakataha.
COVID-19-ni tikarang da•o June jani gnigipa antimango a•dokona sokbatainaba gnang aro unosa bilsi 18 batgimin manderangko tika su•taina man•gnok ineba Health Minister parakataha.
Meghalaya a•dokosan ong•aigija gipin a•dokrangoba tikarang chu•ongjaengani gimin bilsi 18-oni bilsi 44 ong•gipa manderangna tika su•aniko dontongchengna nangtokenga ineba Health official-rang parakataha.
Da•o dipet Meghalaya a•doko sak 4,63,951 manderang COVID-ni tikako su•e ra•manaha aro ianoni sak 3,89,627-de skanggipa tikakosan su•e ra•engkua indiba sak 74,324 manderangde gnigipa tikakoba su•e ra•manaha.
