Shillong, June 2: India a·songo bi·sarangni pneumonia man·e sianiko komiatna gita ma·mong sorkarini ra·gatgipa Pneumococcal Conjugate Vaccine (PCV)-ko Budbar salo East Khasi Hills a·jaoba Pomlum PHC-o a·bachengate on·angaha aro ia PCV-ko a·bachengatanio Mawphlang-ni MLA SK Sunn, mongsonggipa sokgipa ong·e bakko ra·angaha.
Ia PCV-ko a·bachengate on·angani somoio SK Sunn, jinmana aganprakengon, ian namgniko man·enggipa ma·giparangna aro uamangni dedrangna ra·gatgipa program ong·a ine parakangenba, ia namgnirangko maming neng·nikani grian re·bae ra·echina gita ma·giparangko didiangaha.
Ia PCV-ko a·bachengatanichi bi·sa bakgitchakrangni pneuomonia man·e sianiko bewalan komiatna man·gnok ineba Sunn parakangaha.
Ia PCV-ko a·bachengatanio NHM Meghalaya-ni Mission Director Ram Kumar-ba dongpae jinmana aganprakengon, Meghalaya a·dokoba an·o donggipa me·chikrang aro bi·sa bakgitchakrangni sianirangko bang·en nikna man·engani gimin ia programa-ara namen nangchongmotgipa ong·enga ine parakangaha.
Da·o dipet bilsi 5-na komikuenggipa bi·sarang bang·batan pneumonia-ni a·selan sibatenga ine nikna man·a aro iani giminsa India sorkari ia PCV-ko NHM gita maming tangka paisa gri bi·sarangna on·na gita a·bachengatahachim. Ia PCV-ko bi·sarangna, anti dok gapani ja·man skanggipa tikako, anti 14 gapani ja·man gnigipa tikako aro jasku gapani ja·man gittamgipa tikako on·anggen.
Ia tikarangko private hospital-rangoba pongprako gong 3000/- ka·e brena man·gen ine u·iataha.
