Shillong, Jan 2: Meghalaya a•doko sabisi man•anirang komiroroangengahani gimin da•al salni bako Meghalaya sorkari tom•e chanchirimangenba, sabisini giproroaniko champengna dongimin adita niamrangko dingtangataha.
Meghalaya a•dokni Deputy Chief Minister Prestone Tynsong-ni parakatani gitade, a•doko night curfew-ko walni 11:00 bajioni pring 5:00 bajiona ong•atangkugen indiba Shillong-o manderangko salruragipa bus, sumo, taxi aro uandakgipa garirangna odd-even nombor dake re•rurana dongimin niamko da•o sorkari ra•galatskaaha. Private garirangnade ia apsan niamkon ja•rikangkugen ineba Deputy Chief Minister parakataha.
Olakkiram nokrangna dongimin niamrangni bidingo talatangengon, olakkiram nokrangoba da•o 75 percent-ni gita manderang tom•e olakkina man•gnok ine Deputy Chief Minister parakataha.
Apsan daken jinma tom•anirang ba uandakgipa program-rangko ong•atanioba da•o 75 percent-ni gita manderang tom•na man•gnok ine Tynsong parakataha.
Deputy CM-ni u•iatani gitade, hostel-rang aro private creche-rangkoba da•o a•doko kulipilna man•gnok.
Kal•susaanirangko ong•atna dongimin niamrangni bidingo janapatengon, dingtang dingtang kal•susaanirangkoba da•o a•doko ong•atna man•gnok aro kal•chakgipa biaprango 75 percent-ni gita manderang tom•e nina ba bak ra•na man•gnok ine Tynsong parakataha.
Deputy Chief Minister-ni parakatani gitade, Meghalaya a•dokni pilak biaprangon da•o tourist spot-rangkoba kulipiltaignok aro bilsi 10-na komigipa bi•sarangko man•chape butchuma budeparangba tourist spot-rangona re•angna man•gnok.
Skulrangko kulina dongimin niamrangni bidingo janapatskaengon, Shillong, Tura aro Jowai-o class 1-oni class 5-ona tong•sakode kulina man•gnok indiba health department-ni dongimin niamrango pangchakesa skulrangko kulina man•gen ine Tynsong parakataha.
