Shillong, June 2: Batanggimin konta 24-ni gisepo Meghalaya a•doko sak 24 manderang COVID-19 man•e siangdapaha aro uandaken a•doko COVID-19 man•e sianggiparang gimik sak 600 batangaha.
Meghalaya a•doko COVID man•e sianiko komiatna rakbee kamrangko ka•engoba salprakon sak 20 aro una bate siangrongengani gimin ian a•dokni health official-rangna jajrengna nanganiba ong•engachim.
Re•anggipa Mongolbar salosan sak 14 manderang COVID-19 man•e siangahachim aro uandaken Budbar saloba sak 24 manderang siangdapahani gimin da•o a•doko COVID-19 man•e sianggiparang gimik sak 616 gapengaha.
Konta 24-ni gisepo COVID man•e sianggipa sak 24 manderangoni sak 13-de East Khasi Hills-o, sak 6-de West Jaintia Hills-o, sak 2-de East Jaintia Hills-o, sak 1-de Ri Bhoi a•jao aro sak 2-de West Garo Hills a•jao ong•achim.
Da•o dipet Meghalaya a•dok gimiko COVID man•e sigiparangoni East Khasi Hills a•jaon sak 494 gapengahani gimin ia a•jaon sigiparang bang•batgipa ong•enga aro uni ja•man West Jaintia Hills a•jao sak 44 gapskaengahani gimin gnigipa ong•skaenga.
Meghalaya a•doko COVID-19 man•e sianggiparang batrorobaengoba sabisioni nampilgiparangba salantian batrorobaskaengaha aro uandaken Budbar saloba sak 711 manderang COVID-19-oni nampilna gita man•aha.
Budbar salona kingking COVID-19-oni nampilgiparang Meghalaya a•dok gimiko sak 29,578 gapengaha indiba ia apsan salon sak 532 manderang COVID man•dapskaahani gimin COVID man•e dongenggiparangba sak 6403 ong•skaengaha.
Budbar salo COVID-19-oni nampilgipa sak 711 manderangoni sak 320-de East Khasi Hills a•jao, sak 148-de Ri Bhoi a•jao, sak 65-de South Garo Hills-o, sak 43-de East Jaintia Hills-o, sak 39-de West Jaintia Hills-o, sak 27-de South West Khasi Hills-o, sak 20-de West Garo Hills-o, sak 18-de West Khasi Hills-o, sak 14-de South West Garo Hills-o, sak 11-de North Garo Hills-o aro sak 6-de East Garo Hills a•jao ong•a.
